ZAZINGCONO LEZI ZIGAMEKO NGESIKHATHI SIKANKONYENI
MHLELI: Isihluku sothisha ezinganeni zabantu esibonakala kuma- video, siyethusa. Kubonakala sengathi bekungcono ngisho ngezikhathi zethu kusavumelekile ukushaya izingane.
Umuntu ubesathuswe wukubona lowaya mama waseKumhlophe High School eMlaza evuthuza izingane emhlane, engenandaba nobucayi bomgogodla esibaziyo naye abaziyo. Umuntu usebone amanye ama- video lapho othisha besilisa beshaya izingane ngendlela eyethusayo.
Omunye uvuthuza intombazane umzimba wonke ngenduku, ihayize kudume isikole sonke. Omunye ubonakala eshaya izingane ezandleni imivimbo othi uma uyibala yeqe e-10 ingane ngayinye. Sekucacela ngisho ingane encane ukuthi uMnyango wezeMfundo KwaZulu-Natal wehluleke wancama ukuvikela izingane zabantu ekuhlukunyezweni ngokushaywa ezikoleni. Into ozoyizwa beyisho yimbudane yokuthi izingane mazibike emnyangweni, zivule namacala uma othisha bezishaya.
Le nto ifana nokuthi kuthiwe abantu mabangavumi ukulayishwa ematekisini ngokweqile. Yini engenziwa ngumgibeli etekisini ngoba umshayeli uvele athi uma unenkinga yehla etekisini lakhe.
Nakhona ezikoleni uma uke wakhononda ngokushaywa kwengane yakho, leyo ngane iyadutshwa ingamakelwa nomsebenzi wayo, ifeyiliswe ize ishiye isikole. Into eziyaziyo nje lezi zikhulu zakhona wukubonakala zehla zenyuka esikoleni uma kwenzekile kwavela i-video, kawuzwa nokuthi zisuke ziyokwenzani. Uma ingane ishaywa ihayize isikole sonke, kusuke kucace bha ukuthi lowo thisha usuke engantshontshi kodwa usuke enza into eyenziwa yibona bonke kuleso sikole, bevunyelwe nguthishomkhulu nesigungu sakhe.
Yini eyenza uthishomkhulu nesigungu sakhe bangathathelwa izinyathelo ngoba yibona abasuke begunyaze ukushaywa kwezingane? Bona labo ngqongqoshe abafike noMnu Sihle Zikalala kwikhabhinethi yaKwaZulu-Natal, iyabonakala nje into abayenzayo?
Mina bandla kangikaboni lutho, lezi zigameko zokuhlukunyezwa kwezingane zazingcono ngesikhathi sikaNkk Peggy Nkonyeni ngoba wayezifikela mathupha esikoleni. Bheka Ngwane E-HIBBERDENE