Ibhekwe ngabomvu ekaBudler ePhilippines

IBHEKWE ngabomvu eNingizimu Afrika impi ye-International Boxing Federation (IBF) Light Flyweight phakathi kukaHekkie “Hexecutor” Budler wakuleli noMilan Melindo wasePhilippines ezokuba ngoMgqibelo ekuhambeni.

Le mpi ezoboniswa bukhona kwiSS6, kulindeleke ukuthi ibe sezingeni eliphezulu njengoba womabili la mabhokisa eshaya isibhakela esisezingeni eliphezulu.

UBudler nguyena ophonsele le ngqwele inselelo, kanti isiphumele obala ngokuthi ngeke ikuvumele ukuphucwa isicoco sayo phambi kwabalandeli bayo. UMelindo ubuye naleli bhande kulo nyaka njengoba elithathe ehlulela eJapan u-Akia Yaeashi phambi kwabalandeli bakhe bakuleliya lizwe (eJapan). Usahlulwe ezimpini ezimbili kuphela kwezingama-38 asezilwile selokhu engene kulo mdlalo ngonyaka wezi-2005.

UBudler ugabe ngerekhodi lezimpi ezingama-33 asahlulwe kabili kuzona.

UBudler uzokube eqhutshwa nguCollin Nathan osemnkantshubomvu emkhakheni wokulolonga amabhokisa kuleli.

UNathan usehlale kaningi ekhoneni ezimpini zomhlaba. Amangwevu akhe kulindeleke ukuthi awakhiphe wonke ukusiza uBudler ukubuya naleli bhande kuleli.

philani.ncalane@ilanganews.

ISITHOMBE NGABE: GALLO IMAGES NGUMSHAYISIBHAKELA wakuleli uHekkier Budler olibangise ePhilippines ukuyobhekana noMilan Melindo wakuleliya lizwe ngoMgqibelo.