Otakalani bazovulela owePSL
Bazodlala noSuthu ngaphambi kokulibhekisa e-USA ngesonto elizayo
IZOBHULELA amazolo umdlalo wePremier Soccer League (PSL) iMophela Primary School ezomela iNingizimu Afrika emidlalweni yomhlaba yeDanone Nations U/12 Cup ngelizayo e-United States of America (USA).
IMophela izobhekana nesikwati sika-U/15 samaZulu FC emdlalweni ozogijinywa ngaphambi koweNational First Division (NFD) phakathi kweReal Kings United ne-Ubuntu Cape Town ngoMgqibelo ngo-15h00 eSugar Ray Xulu Stadium, eClermont.
Amakilabhu aKwaZulu-Natal asisize kakhulu lesi sikole njengoba silungiselela ukuya phesheya kwezilwandle. Ngeledlule besihambele umdlalo weNFD phakathi kweRoyal Eagles neStellebosch FC ophele ngo-1-1 eMgungundlovu, kanti ngoLwesibili kusihlwa besihambele owe-Absa Premiership obuphakathi kwamaZulu neMaritzburg United kuba ngu-1-1 eKing Zwelithini Stadium, eMlazi.
Lesi sikole sibonge kakhulu iKings ngokusisiza ukuze sikwazi ukuzilolonga eSugar Ray njengoba singenayo ingqalasizinda. Sigcine sizicijela eMpumalanga Stadium, eHammarsdale.
USibusiso Ntsele onguThishanhloko wakulesi sikole, uthi kubajabulisa kakhulu ukubona amakilabhu esifundazwe ebambisene nabo.
“Ngesikhathi sibuya kokudla ubhedu eGoli, abafana bethu bamukelwe nguBongani Ngidi ongumnikazi weKings ngomcimbi. Uphinde wasizamela ukuthi sisebenzise inkundla abayisebenzisa emidlalweni yasekhaya ukuba sijime kuyona. Namuhla ngoLwesine silindele ukuhanjelwa nguZandile Gumede oyiMeya yeTheku nezikhulu zomNyango WezeMfundo.
“UGumede besithenjiswe ukuthi uzofika ngeledlule kodwa wabuye wathathwa uhambo oluphuthumayo. Lokhu kusho lukhulu kithina. Sicele ukubhekana nabadlali baka-U/15 kumaZulu ngoba sifuna abafana bethu badlale nabadlali abade kunabo njengoba phesheya bezobhekana nesimo esifanayo.
“Silindele ukuthi babuye seluqine kakhulu ukhakhayi. Izinhlelo zokuhamba seziqondile njengoba kade siyise ithimba lokugcina labadlali ukuyohlonywa imibuzo ehhovisi leNxusa lase-USA eliseThekwini. Sibonga kakhulu kumakilabhu ngakho konke asisize ngakho. Sibonga nabadlali abasisizile ngokwahlukana,” kusho uNtsele.
KONKE SEKUMI NGOMUMO NGEZIMPI ZAKWANONGOMA