USUTHU LUKHALA NGOTOKOLOSHE BE-ARROWS
Luthelwe ngehlazo ngaBafana Bes'thende
ABALANDELI bamaZulu FC basole iLamontville Golden Arrows ngokusebenzisa otokoloshe ezabo ziguqiswa ngo-4-1 kowe-Absa Premiership izolo ngeSonto ntambama ePrincess Magogo Stadium, KwaMashu.
Amagoli okunqobe ngawo i-Arrows aqotshelwe enethini nguLerato Lamola ngomzuzu wama-20, uSphelele Magubane ngowama-55, uKudakwashe Mahachi ngowama-93 nelikaKnox Mutizwa ngowama-94. Elokubika loSuthu lishaywe ngu-Ouro-Akoriko Sadate ngomzuzu wama-34.
USuthu kulo mdlalo luthole inqwaba yamathuba kodwa lwahluleka wukuwasebenzisa. Amabhola alo abevele angqubuze ipali angangeni enethini.
Abalandeli boSuthu abebephume ngezinkani, basole i-Arrows ngokuthi isebenzisa otokoloshe yingakho amagoli engangeni.
Kucishe kwasuka uthuthuva kungena igoli lesithathu lapho abalandeli boSuthu bengcofwe ngabe-Arrows baqonda ngqo kubona besho ukubathela isibhaxu. Kusize isibindi sabaqaphi bodweshu abangazange bahlehle babavimba kubonakala ukuthi bathukuthele.
Nonondweba uVictor Hlungwani uphume ngenhlamba bethi ubenzelela.
UCavin Johnson ocija uSuthu, uthi bekufanele baqede ngeArrows ngesiwombe sokuqala.
“Kulo mdlalo kangazi ukuthi kwenzakaleni, igoli yilona elinqabile ngoba ibhola belishaya ipali nje kuphela. Kodwa-ke kufanele sidlule kule nto sibheke umdlalo wethu ozayo esizowugijima neBidvest Wits (ngoLwesithathu ebusuku eMlazi). Ngeke ube lula kodwa sizokulwa,” kusho uJohnson.
UClinton Larsen ocija i-Arrows, uthi konke kuhambe ngokohlelo. Nokho uthi bekumele banqobe ngamagoli ayisi-6 ngoba uSuthu beluvulekile emuva.
Kulo mdlalo kuvele kwacaca ukuthi abalandeli bala makilabhu kabafunani njengoba bebengcofana bethukana nangenhlamba. Abanye baze basongelana ngoku- gwazana ngenxa yezingoma abebezicula bengcofana ngazo. I-Arrows ishaye igoli kuqala abalandeli bayo bacula bebheke ngqo kwaboSuthu.
Bashaye ingoma ebinezinhlamvu ebezithi: “Eminye imizi izovalwa” nenye ebithi: “uSis Mato akanayo imali yokuthenga iThanda”. AboSuthu bebethule. Kube wukukora nje oSuthwini bachwaza bejabula.
Kugcine abe-Arrows kwazise yiyona enqobe lo mdlalo. Bebejabula bethi uSuthu luphelile umsimbithi.