OWE-BUCS USENETHEMBA NGOKUGIJIMA KWIBAFANA
IPREMIER Soccer League (PSL) seyilinde umbiko kanondweba ngothuthuva olusuke emdlalweni weKaizer Chiefs neBidvest Wits ophele kungu-1-1 kwi-Absa Premiership ngoMgqibelo ebusuku eFNB Stadium, eGoli.
Kulo mdlalo uSteve “Mphathi” Komphela ongumqeqeshi weChiefs ubonakale ehlohlolozana kanzima noJonathan Schloss ongesinye sezikhulu zeziTshudeni.
UKomphela utshele abeSuperSport TV ukuthi ucasulwa yindelelo ekhonjiswa ngokuphindelela wumfana womlungu kuyena.
Ezithombeni zeSuperSport kucacile ukuthi uKomphela ubexabana noJonathan kanti bobabili bekungathi bayahalelana ukubambana nangamawashingi kwasiza abala makilabhu abebeseduzane.
Kubuye kwavela uGeorge Mogotsi oyisikhulu sezokuxhumana kwiWits exabana noPhelelani Ndaba obephethe lo mdlalo. Kukholakala ukuthi ubemsola ngezinqumo zakhe.
USolwazi uRonnie Schloss ongesinye sezikhulu zePSL, utshele leli phephandaba ukuthi nakuba engenalo ulwazi lwalolu daba kodwa bazolinda umbiko kanondweba bese bethatha isinqumo esifanele nxa lwenzekile.
“Uma sewufikile umbiko kanondweba sabona ukuthi kukhona abafake iligi ehlazweni sizobabizela ekomidini eliqondisa ubugwegwe okuyilona elizonquma,” kushaya ngamafuphi uSolwazi uSchloss.
Isimo esifuze lesi sesithanda ukujwayeleka kunobhutshuzwayo waseNingizimu Afrika njengoba noPitso “Jingles” Mosimane ocija iMamelodi Sundowns exabane kwashunqa uthuli noGordon Masondo oyisikhulu esiphezulu seLamontville Golden Arrows.
Lesi sigameko senzeke emuva komdlalo weNedbank Cup onqotshwe ngaBafana Bes’thende ngo1-0 wegoli likaNduduzo “Sulu” Sibiya nonyaka. Bobabili babonakala behilizisana kanzima emuva kwalo mdlalo.
Ukushiselwa yigazi sekuyinto eyinsakavukela umchilo wesidwaba kwiPSL njengoba uMandla “Mhloli” Ncikazi oyisekela likaClinton Larsen ocija i-Arrows ahlohlolozana kanzima no-Ernst “Mazinyo.com” Middendorp esapheka iMaritzburg United.
Bobabili laba baqeqeshi babizelwa ekomidini lezigwegwe ngesenzo sabo sokwehlisa isithunzi seligi.