INGANE IPHOSEKE EMNCINDWENI YASHONA
Kuhlehle umsebenzi wokungenisa izidalwa
KUHLEHLE umsebenzi wokungenisa izidalwa obekufanele wenziwe izolo ngeSonto emndenini wakwaDlamini, eMahlabaneni, KwaNongoma, enyakatho yeKwaZulu-Natal, emuva kokushona kwengane (2) ephoseke emncindweni wokuvubela utshwala besintu ngoLwesihlanu.
UBandile Dlamini ushonele esibhedlela saseMgungundlovu, maphakathi nalesi sifundazwe, sikahulumeni, emuva kokuba ephuthunyiswe emtholampilo wendawo iNdlozana esesimeni esibucayi.
Udluliselwe esibhedlela saseNgwelezane, eMpangeni, enyakatho-mpumalanga yeKwaZuluNatal, kodwa kwatholakala ukuthi kunomthamo omkhulu weziguli wase edluliselwa eMgungundlovu. UBandile ushe ezandleni, ebusweni nasemzimbeni. Kuthiwa ubengabambeki ngenxa yokuthi isikhumba besixebuka sigxaza namanzi.
UNkk Sencelisile Gazu, onguninakhulu kaBandile, uthi ushaqekile ngalesi sigameko.
“Namanje kangiqondi ukuthi yenzeke kanjani le nto ngoba ingane ibivakashele kubo kungekho okonakele,” kusho uNkk Gazu.
Unina wengane, uNkz Lungile Nxumalo, uthi uthole ucingo lumazisa ukuthi umntanakhe usephuthunyiswe esibhedlela, isimo sakhe sibi kakhulu ngenxa yokungena kwayo ngobuso ebhodweni ebelinomncindo oshisayo.
“Umfana wami bekuwukuphela kwakhe. Kangazi noma ngishaywa ngabangasekho yini, uphumaphi lo Sathane onomsila oholele ekube- ni kudlule emhlabeni ingane yami ngalolu hlobo. “Ngethukile uma ngizwa kuthiwa ingane isiphuthunyiswe esi- bhedlela ngenxa yokusha. Bengingekho ekhaya njengoba ngingumuntu oziphilisa ngokubamba amatoho emizini yabantu.
“Namanje kuselukhuni ukuba inhliziyo yami yamukele ukuthi akasekho emhlabeni futhi ushone ngalolu hlobo. Lokhu kuphoqe ukuba ungabe usaqhubeka umsebenzi wabaphansi njengoba bekuhleliwe,” kusho uNkz Nxumalo.
Uthi kabawabikelanga amaphoyisa ngalolu daba.
UMnu Sazi Mhlongo ongumelaphi wendabuko nesazi sezamasiko, uthe isigameko salolu hlobo siyinkomba yokuthi kukhona ophehla amanzi amnyama nokuthi kunokwenzeka ukuthi kakubanga khona ukuvumelana kahle phakathi kwamalunga omndeni ngaphambi kokuba kwenziwe lo msebenzi wokungeniswa kwezidalwa.
Kangazi noma ngishaywa ngabangasekho yini, uphumaphi lo Sathane onomsila...