Sishiye kukhalwa isishingishane
Kuthiwa besihamba ngesivinini esiphezulu kakhulu
KULIMALE kanzima abantu abayisihlanu ezigamekweni ezimbili ezahlukene KwaZulu-Natal ngenxa yesishingishane esinamandla esishiye kukhalwa ezindaweni eziningi kulesi sifundazwe njengoba imizi eminingi icekeleke phansi.
Ngokusho kokhulumela abezimo eziphuthumayo, uMnu Robert McKenzie, abane balimale kanzima kade kuwa uphahla lwebhilidi elinezitolo ekhoneni lomgwaqo uDkt Yusuf Dadoo Street (Grey/ Broad Street) noDkt Prixley KaSeme (West Street) enkabeni yeTheku.
Omunye ulimale kuwa uphahla egalaji likaphethiloli elikuWarwick Triangle khona eThekwini. Bonke laba abalimele baphuthunyiswe ezibhedlela ezahlukene lapho belashwa khona. Imizi eminingi icekeleke phansi kwaphazamiseka nokuhamba kwezimoto njengoba izihlahla kwezinye izindawo beziwela emigwaqweni ngenxa yalo moya onamandla.
Izifunda ezishayeke kakhulu kubalwa uMgungundlovu, eThekwini noGu. Nase-Eastern Cape sigadlile njengoba izindawo okubalwa kuzona iPort St Johns kuya eLusikisiki sishiye kukhalwa. Ngokusho kwesangoma sezulu sakwaSouth African Weather Services esizinze eThekwini, uMnu Julius Mahlangu, lesi sishingishane besihamba ngesivinini esiwu-61-88km/h.
“Nakuba abantu besibaxwayisile ngalesi sishingishane kodwa nathi besingalindele ukuthi singase sibe namandla angaka futhi senze umonakalo ongaka. Yize lesi sishingishane sesidlulile, kodwa izimvula ezinamandla zisalindelekile ekuseni namhlanje ngoMsombuluko ezindaweni ezisentshonalanga yeKwaZulu-Natal.
Izulu lingaze liqale ukuphenya kahle ngezikhathi zantambama namhlanje,” kusho uMnu Mahlangu.
UMnyango wezokuBusa ngokuBambisana nezoMdabu KwaZuluNatal, esitatimendeni osithumelele abezindaba izolo ngeSonto, uthe ithimba labo lezinhlekelele liphansi phezulu lisakhuculula umonakalo odalwe yisimo sezulu.
Lokhu kukhuculula cishe kuzothatha izinsuku ezintathu njengoba umkhulu umonakalo owenzekile. “Nakuba engekho oshonile ngenxa yalesi sishingishane, kodwa ocwaningweni esilwenzile, sithole ukuthi miningi imizi epheshukelwe wuphahla, izihlahla zawela emigwaqweni kwalimala izimoto zabantu. Kumanje ithimba lethu lezinhlekelele linikeza usizo kuleyo mindeni ekhahlamezekile.
"Siyalibonga naleli thimba elisebenza ngokukhulu ukuzikhandla ukusiza imiphakathi yakithi engenayo indawo engabalekela kuyona uma lezi zinhlekelele zehla,” kusho uNgqongqoshe Nomusa Dube-Ncube esitatimendeni.
KUSALINDELEKE IMVULA ENAMANDLA NAMUHLA.