EZISHAQISAYO NGOZWELI MKHIZE
IVEZA ezishaqisayo ngoMgcinimafa we-African National Congress (ANC), uDkt Zweli Mkhize, incwadi ebhalwe yintatheli esimnkantshubomvu esihloko esithi: “Khwezi” ekhuluma ngempilo kaNkz Fezekile “Khwezi” Kuzwayo ongasekho, odume kakhulu ngesikhathi evulela uMengameli Jacob Zuma icala lokudlwengula ngowezi-2006.
Le ncwadi, ebhalwe nguNkk Redi Tlhabi, igeqa amagula ngokuhlukumezeka kukaNkz Kuzwayo ngesikhathi secala nangokungena shi ngekhala kulolu daba kukaDkt Mkhize ngenhloso yokumcindezela ukuba esule icala.
Ngokombiko wephephandaba lesiNgisi eliphuma ngeSonto, iCity Press, kule ncwadi uDkt Mkhize ubengumngani omkhulu kayise kaNkz Kuzwayo, uMnu Judson Khuzwayo noMengameli Zuma ahlangana nabo ngesikhathi besekudingisweni futhi yena njengengane, ubebabiza ngoninalume.
Uyise kaNkz Kuzwayo ugcine ngokushona engozini yemoto eZimbabwe. Ngokwencwadi kaNkk Tlhabi, uDkt Mkhize uthumelele uNkz Kuzwayo ummeli ukuba ayomncenga ukuba angalufaki enkantolo lolu daba.
Ezohlangana nalo mmeli ubephelezelwa ngunina, uNkk Beauty Kuzwayo, nomngani wakhe amthole besekudingisweni, owaziwa ngoKimmy kodwa isibongo sakhe esingadalulwanga. Engxoxweni ababe nayo, ummeli ukuveze obala ukuthi ngokwakhe ufisa ukuba uKhwezi avele ayeke ukuqhubeka necala ngoba akaboni ezoliwina enkantolo.
Kuthe uma eqinisa ikhanda ethi uyaqhubeka necala, ummeli wathi: “Umalume Mkhize uzomangala ukuthi phezu kokuba sesikhulumile kodwa uyenqaba ukwesula icala.
“Umalume uZweli ubethi uma evakashile ekhaya, azwakale engumuntu ongasohlangothini lwethu futhi kube lula ukuthi simthembe. Kwesinye isikhathi uma ezobona umama, ubesisiza nangemali yokuthenga ukudla,” kusho uNkz Kuzwayo kule ncwadi. Okunye okuqukethwe yile ncwadi wukuthi: *UNkz Kuzwayo ucindezelwe ukuba angene ngaphansi kohlelo lwamaphoyisa oluvikela ofakazi esikhundleni salolu olusingethwe yiNational Prosecuting Authority (NPA) ngoba kuthiwa lolu hlelo ngeke lusaqhubeka ngoba kunenkinga yemali.
*Amaphoyisa abeqashelwe ukuba abe ngonogada bakhe abeqopha yonke inkulumo abenayo nomluleki wezengqondo nomshushisi, uCharin de Beer, kodwa kuNkz Kuzwayo bekungathi lokhu kwenzelwa ukumvikela. Ekugcineni le miqopho (tapes) ilahlekile, okungenzeka ukuthi kunolwazi olukhishiwe kuyona.
*Onogada abebemgadile bebemdlisa ushevu ngommeli wakhe, bethi akanalo ulwazi olwanele ngezomthetho, bembuza nokuthi wenziwe yini ukuba akhethe ukumelwa wumlungu bekhona abamnyama.
*Obeyinhloko yezobunhloli kwezobugebengu obuhleliwe, uMnu Mulangi Mphego, uke wazama ukupenda isithombe esingesihle ngoNkz Kuzwayo ngesikhathi efike endlini abegcinwe kuyona, emcela ukuba ayogona emathangeni akhe ngenhloso yokuthi basebenzise lokhu enkantolo ukuveza ukuthi ubengumuntu ongaziphethe kahle, ozicelele ucansi kumengameli hhayi ukuthi umdlwengulile.