EZINYE IZINSOLO EZIMBI NGENDUNA YESIZWE SAKWASHEZI
KUQUBUKE ezinye izinsolo ezimbi ngenduna yesizwe sakwaShezi eNkandla, maphakathi neKwaZulu-Natal, ILANGA elike labika ngayo phambilini ukuthi kutholakale inkomo yelunga lomphakathi emzini wayo - obesekuphele iminyaka idukile - isiyiphawulile.
Leli phephandaba lithole ukuthi esikhathini esingangenyanga esedlule, kutheleke abantu emzini kaMnu Fana Ngidi beyolanda izinkomo okusolwa ukuthi zebiwe. Kuthiwa lezi zinkomo zitholwe seziphawuliwe, okwenza abantu basole ukuthi lokhu kwenziwa ngenhloso yokudukisa umkhondo.
Umthombo weLANGA okule ndawo uthi isimo simuncu endaweni njengoba kulokhu kuqhubeka njalo kutholakala izinkomo zabantu esibayeni senduna.
“Into ecasula abantu kakhulu wukuthi induna idayisa inyama, okudidayo wukuthi isikhathi esiningi iyidayisela abantu bangaphandle hhayi abasendaweni. Konke lokhu kwenza sisole ukuthi ziningi izinkomo zabantu ezibulawayo zidayiswe,” kusho umthombo
Uthi kunabantu baseKhombe, khona eNkandla, abalahlekelwe yizinkomo eziyisi-8, eyodwa yazo kuvela ukuthi itholakale esibayeni sikaMnu Ngidi.
Utshele ILANGA ukuthi lokhu kuwucasulile umphakathi ngoba uMnu Ngidi akazange atshele muntu ukuthi kunenkomo angayazi esibayeni sakhe, okwenza kusoleke ukuthi yebiwe.
“Le nto isiyenze amalunga omphakathi asola ukuthi induna inolwazi ngokulahleka kwezinkomo zabantu. Emasontweni amabili edlule kunabantu baseKhombe abafike induna isiyihambisile inkomo emuva kokuzwa ukuthi abanikazi bayo bayayifuna.
“Bekungakapheli sikhathi esingakanani kufike abanye nabo beyohogela umkhondo emuva kokulahlekelwa yizinkomo zabo. Bafike bazithola ezimbili esibayeni senduna.
“Konke lokhu kushiya imibuzo ngoba emphakathini induna ibingakaze ibikele muntu ukuthi kunenkomo engayazi esesibayeni sayo. Umbuzo esinawo uthi zingaki izinkomo zabantu ezisesibayeni senduna engabikeli muntu ngazo uma izitholile,” kusho umthombo.
UMnu Skhumbuzo Mthiyane, ongumunye wabantu abebelahlekelwe yizinkomo - ezakhe ezidukile ziyisi-8 - uthi eyakhe uze wayilanda esikiti oNdini, enyakatho yeKwaZulu-Natal, yize ubesezwile ukuthi ibisesibayeni sikaMnu Mngadi.
Uthi uMnu Mngadi ubize amaphoyisa ayithatha inkomo yakhe yize ebesezwile ukuthi ngeyakhe. Utshele ILANGA ukuthi nalezi ezinye izinkomo uyazifuna ngoba kusobala ukuthi induna inolwazi ngokuduka kwazo.
“Sezizonke izinkomo zami ezilahlekile ziyisi-8 kodwa ngathola eyodwa. Ngize ngasebenzisa u-R5 000 okuyizindleko zokuyilanda lapho ibisithuthelwe khona (oNdini).
“Kuyangixaka ukuthi kungani engazange awazise umphakathi ukuthi kunezinkomo ezisesibayeni sakhe angazazi njengoba eze wabiza amaphoyisa sengizwile ukuthi ikuyena. UMnu Ngidi ngimtshelile ukuthi ngiyazifuna nalezi ezinye izinkomo zami ngoba kuyacaca ukuthi unolwazi lokuthi zikuphi,” kusho uMnu Mthiyane.
Ethintwa uMnu Ngidi ngalolu daba, uvele wabhoka ngolaka ebuza ILANGA ukuthi ngubani olinike inombolo yakhe.
“Ngubani okutshele ukuthi mina ngeba izinkomo? Udaba lwezinkomo ngalubika emkhandlwini (wenkosi), uma ufuna ukuzwa ngalo woza emkhandlwini ungakhulumi nami,” kubhoka uMnu Ngidi.
Ebuzwa mayelana nabantu abafike kwakhe beyolanda izinkomo zabo, uMnu Ngidi usole ILANGA ngokufuna ukudicilela phansi igama lakhe.
“Inhloso yakho wukungidelela, ngubani okunikeze inombolo yami ukuba uzongidelela? Kakukho nkomo engiyebile mina futhi uma ufuna ukuzwa ngalokho woza emkhandlwini weNkosi uShezi,” kusho uMnu Ngidi maqede wavala ucingo.
Undunankulu wesizwe sakwaShezi, uMnu Mavondwe Ngonyama, ethintwa yileli phephandaba uthe usemngcwabeni kodwa uma lifuna ukuzwa kahle ngalolu daba maliye emkhandlwini wenkosi.
Kungani engazange awazise umphakathi ukuthi kunezinkomo angazazi?