ITHUBA ELIYINGQAYIZIVELE KWABE-GOSPEL ID KWI-ESSENCE
BAZOTHOLA ithuba eliyinqayizivele lokushiyelana inkundla nezihlabani zaphesheya abawine kwiGospel ID.
Lo mncintiswano osudonse iminyaka emihlanu ubuvalwa izolo eNanda, eJL Dube Stadium.
Ngokusho kwesikhulu esiyinhloko yomnyango wezamaPaki, ezokuNgcebeleka nezamaThuna (PRC) kumasipala weTheku, uMnu Thembinkosi Ngcobo, bonke laba abake badla umhlanganiso kulo mncintiswano, bazothola ithuba eliyinqayizivele emcimbini i-Essence Festival ozokuba mhlalulunye kuMfumfu (October) nonyaka.
Kulo mcimbi we-Essence kuzonandisa iJoyous Celebration nomfundisi wezinkulumo ezakhayo waseMelika uTD Jakes.
UMnu Ngcobo uthi lokhu bakwenza ngoba bafuna ithalente lalapha ekhaya lisabalale umhlaba wonke, lingapheleli nje emgwaqweni.
“Asifuni ithalente labo lishabalale, bagcine sebedayisa umzimba noma sebecwile ezidakamzweni kodwa sifuna ukukuqinisekisa ukuthi labo abanenhlanhla ithalente labo liyabasebenzela,” kusho uMnu Ngcobo.
Lo mcimbi ophethe izolo bese kungowokugcina njengoba bekukhethwa labo abadle umhlanganiso kulo nyaka.
Amajaji bekunguDJ Happy Gal, uGa Ndlela, uNdlelenhle Jiyane noMelusi Zondo. Nokho kuze kwashaya isikhathi sokushicilela ILANGA lingakabi nemininingwane yabadle umhlanganiso.
Izicoco bezimi kanje, ophume phambili uthola u-R15000, aphinde aqophe icwecwe lakhe mahhala bese ethola ithuba lokudlala kwi Essence Festival. Owesibili uthola u-R10 000 kanye neDemo yomculo wakhe. Owesithathu yena uthola izi-R5000.
KUGUJWE OLUKA-CHARLS PHILLIPS
BEKUGCWELE omrepha abasazakhela igama emcimbini wokugubha usuku lokuzalwa lukaCharls Phillips. Losomabhizinisi ongumhleli wemicimbi aphinde abe umsunguli wenkampani iRun Durban ubegubha usuku lwakhe lokuzalwa endaweni yobumnandi i82 Hunter Street. Omrepha noDJ bebephuma bededelana. Yize noma bebengekho abaculi abaphezulu kodwa bekugcwele kuvalwe ngomuntu emnyango. Esithombeni iqembu lomdanso weHip-Hop i-031 ebelinandisa.