UQhosha uhlanyise abafundi eMUT ngomaskandi
UNGENE kwachwaza abafundi umculi kamaskandi eMangosuthu University of Technology (MUT) emcimbini we-After Party obulandela okaMiss Mangosuthu kulesi sikhungo semfundo ephakeme ngoMgqibelo ebusuku.
UQhosha ocula umculo kamaskandi ungene washaya inoni lakhe elisihloko sithi “Osozimali” kwachwaza inkundla. Kugcwaliseleke isiqubulo esithi “Unyaka wamabhinca” uQhosha ehlanyisa abafundi.
Ungene ngemuva kukaBabes Wodumo naye oshiye abafundi bemcela impinda ngenxa yemidanso yakhe kanye nezingoma zakhe ezithakaselwa ngabaningi.
Kulo mcimbi obuhlelwe inkampani kaDJ Masiya bekuboshelwe izinkunzi zodwa, okubalwa kuzona uBabes Wodumo, uJnr De Rocker, uTipcee Namadada, uKhuzani Mpungose, uDJ Bhoonu, uDJ Bongz, iDistruction Boyz, uChynaman nabanye abaningi.
Abafundi bebelokhu bejabule njalo bengafuni nokusuka phambi kwesiteji.
Ezokuphepha beziqinile utshwala bungafuneki nangengozi ngaphakathi. Uhlelo beluphethwe ngesinono nguSlot MC noKhaya Dladla odume ngoGC emdlalweni kamabonakude, Uzalo.
UDJ Bongz uthe engena abafundi bamcela ukuba abadansele, akazange achithe sikhathi uvele wenza njengoba bemcelile.
Lo mcimbi obizwa nge After party kaMiss Mangosuthu udonse kwaze kwasa emnyango abaculi belokhu bephambana estage. Ububanjelwe eThe Rugby field ngaphakathi eMangosuthu. Isimo sezulu asizange siphoxe yize noma besibuye sethuse ngamathi ezimpukane.
Kugcwaliseke isiqubulo esithi Unyaka Wamabhinca...