Bakhala bayazithulisa abaqolwe ngoTransnet
BAKHALA bayazithulisa abesifazane ababili baKwaDlangezwa eMpangeni, enyakathompumalanga yeKwaZuluNatal, abathi baqolwe ngowesifazane izinkulungwane zamarandi ebathembisa imisebenzi eholelayo kwaTransnet.
UNkz Nonto Xaba (27) noNkz Ncami Mwelase (28) bathi baqolwe nguNkz Gcinile Mngadi imali engango-R8 000 ebathembisa ukuthi uzobatholela umsebenzi kodwa wagcina esebaleka, izingcingo zabo engasazibambi.
Ngokusho kukaNkz Xaba, uNkz Mngadi ubafonele ngoMasingana (January) behleli noNkz Mwelase, ethi uyisekazi, osebenza kwaTransnet, udinga abantu abane azobafaka emsebenzini ngokukhulu ukushesha kodwa kumele bakhokhe u-R8 000 umuntu ngamunye.
Uthe uyisekazi akanankinga uma bezokhokha u-R4 000 bese kuthi ingxenye esele bayikhokhe sebengaphakathi. Ngaleso sikhathi kabazange basole ukuthi banindwa ngopelepele emehlweni, bayizamile imali bamnika uNkz Mngadi namaCV abo, ngokusho kukaNkz Xaba.
“UNkz Mngadi ufike kimina ezothatha imali, wathembisa ukuthi ngeke iphele inyanga singangenile emsebenzini. Kuphele izinyanga engasho lutho, kuthe uma sengimthinta wathembisa ukuthi ngeke liphele isonto.
“Kudlule izinsukwana ngathintwa ngowesifazane ngenombolo ebifihliwe ethi ufona kwaTransnet, wathi izinto zethu bazitholile basazilungisa, kungenzeka sisebenzele eThekwini njengoba izikhala ziningi ngakhona. Sivumile ngoba sixakekile.
“Uphinde wafona uNkz Mngadi esethi masikhokhe u-R500 wokwenza i-medical check up. Simtshele ukuthi ngeke simnike ezandleni leyo mali kungcono basitshele ukuthi basibhukhele kumuphi udokotela sizofike siyikhokhe kuyena.
“Ngesikhathi simtshela lokhu, uvukwe ngamalimi wathi ngeke kwenzeke ngoba uyisekazi uyidinga ngokushesha ukuze akwazi ukuqhubeka nohlelo lokusifaka emsebenzini,” kusho uNkz Xaba.
Uthi uNkz Mngadi ugcine ngalelo langa ukubafonela. Uma bemthinta, ubelubamba ucingo kube wukuzwa nje ukuthi yibona, aluvale.
Uthi bazamile ukuyovula icala kodwa bagcina bengalivulanga ngoba iphoyisa ebelibasiza lithe uma bevula icala nabo lizobabopha ngoba kuyicala ukugwazela umsebenzi.
“Leli phoyisa lithe kungcono ludingidwe enkosini lolu daba ngoba lo muntu osiqolile siyamazi ukuthi uhlala eMachibini ngasenkosini yabaKhwanazi. Kumanje sihlela ukuyobika enkosini,” kusho yena.
Ethintwa yiLANGA uNkz Mngadi, uphike wama ngentaba ukuthi uthathe imali yalaba besifazane. Uthi imali ithathwe ngowesifazane onguNkz Nomusa Mkhwanazi okunguyena obebathembise umsebenzi.
Utshele ILANGA ukuthi naye umnikezile le mali uNkz Mkhwanazi ngoba kwayena ubewudinga umsebenzi.
“Akasatholakali ocingweni uma ngithi ngiyamthinta, kangikwazi nokuvula icala ngoba ikheli ahlala kulona kangilazi,” kusho uNkz Mngadi.
Ebuzwa ukuthi udinga ikheli yini ukuvula icala, uthe ubecabanga kanjalo. Uhlulekile ukunikeza leli phephandaba inombolo yocingo lukaNkz Mkhwanazi njengoba evele wavala ucingo wangabe esalubamba esephinda ethintwa.