Bugweme ubuthaka bamathambo
NAMUHLA sibheka kafushane inkinga evame ukuhlasela abantu abadala yokuba namathambo abuthaka futhi okulula ukuba achachambe noma ephuke, i-Osteoporosis.
Lesi yisifo lapho ukuba buthaka kwamathambo kuya ngokwanda uma umuntu eguga, okuholela ekubeni umuntu omdala ephuke kalula. Amathambo avame ukuthinteka kule nkinga, wumgogodla, yingalo nenyonga. Izimpawu zokungenisa kwaso kazibonakali, kuze kube lapho umuntu eseze wephuka ithambo.
Kuyenzeka amathambo abe lula kangangokuba umuntu uvele ephuke nje noma lokho kwenzeke phansi kwesimo sengcindezi encane kabi. Ubuhlungu obungamahlalakhona ( chronic pain), bubangela ukuba umuntu angabe esakwazi ukwenza imisebenzi eyejwayelekile.
Le nkinga kuyenzeka ihobe iminyaka ngeminyaka kuze kwephuke ithambo kumuntu. Iziveza ngezindlela ezifanayo kwabesilisa nakwabesifazane. Ubuhlungu buya ngendawo kumbe ithambo eliphukile.
Uma lokhu kusemgogodleni, umuntu uzwa ubuhlungu buye ezinhlangothini. Ngokuhamba kweminyaka, ukwephuka kaningi kungadala ubuhlungu obungamahlalakhona ( chronic) eqolo, nokuba umuntu agqisheke abe mfushane kunalokho abeyikho engakahlabeki, kanjalo nokukhokhoba. Kokunye umuntu omdala ugoba kakhulu kuze kube sengathi unesifumbu.
Ngaphandle kokuzephukela, kuyenzeka ithambo lichachambe uma unyakazisa umzimba wenza imisebenzi evamile, ososayensi abakubiza nge-trauma IQ noma yistress fracture. Uma lokhu kwenzeke ezinyaweni ngesikhathi umuntu ehamba noma ehla esitebhisini, kubizwa nge-feet IQ. Ukwephuka enyongeni khona kuvame uma umuntu ewa ngengozi njengalapho eshelela. Umuntu owephuke enyongeni kuthatha isikhathi eside ukuba alulame emuva kokuhlinzwa nokulungiswa umonakalo ngenxa yokuba vele kuyincikinciki ukuphola kwethambo kumuntu omdala.
Nakuba kusiza ukusheshe uzibone izimpawu futhi usheshe ukuzelapha, nokho kalikabi khona ikhambi elikwazi ukuvuselela ithambo eselikhumuzekile ngenxa ye- osteoporosis. Yingakho kumqoka ukuvimba lesi sifo kunokuzama ukuselapha. Lokhu okulandelayo yizaba umuntu angazenza ukuvimba nokuthiba le nkinga ukuze impilo yamathambo akho ibe ngcono:
1. Ukuguqula indlela yokuphila: phakathi kwalokhu kubalwa ukuyeka ugwayi owusikilidi, wukwehlisa uphuzo oludakayo, wukuzivocavoca njalo nokudla ukudla okuphelele ngezakhamzimba okune- calcium ne-vitamin D okwanele.
Kuthiwa ukubhema kunciphisa umthamo we- estrogen, kunjalo nje kunciphisa ukuqina kwamathambo ngisho owesifazane engakanqamuki ukuya esikhathini. Kwabesifazane vele asebekulesi sigaba, ukubhema kungayandisa ingozi yokungenwa yi- osteoporosis.
Ucace bha umyalezo wesisho esithi “ubogawula ubheke" kulabo besifazane bakithi abasakuthatha ngokuthi kuyisitayela ukuphafuza usikilidi bawushebe nophuzo.
Nakuba umthelela wotshwala ne- caffeine kulesi sifo ungakacaci kahle njengalowo kagwayi nokuzivocavoca, nokho uxamu wethukela esizibeni, ukwehlisa kulezi zinto (utshwala ne- caffeine) kuyisenzo esinobuhlakani.
2. Ukuze uthole imishanguzo enqanda ukukhumuzeka kwamathambo nokuwaqinisa, njengeFosamax, i-Actonel, i-Evista, iBoniva, neminye - funa iseluleko sikadokotela. Ukuthasisela isakhamzimba i- calcium ngamaphilisi kakwenele, ngakho kuyadingeka ukuba lesi sakhamzimba sitholakale futhi nangohlobo lokudla esikudlayo. U-vitamin D ubalulekile ekuqiniseni amathambo.
Njenge- calcium, u-vitamin D kakwanele ukuwuthola ngendlela yamaphilisi kugcine lapho, uyatholakala ngokudla nangesikhumba ngokuba uphumele ekukhanyeni lwelanga.
Njengoba kukhona izinto ezinconywayo ukuba uzithole ukuze ubhekane nenkinga yalesi sifo, zikhona futhi okumele uzigweme. Ukusebenzisa ngokweqile uphuzo oludakayo kumele kugwenywe ngumuntu osengenwe yilesi sifo.
3. Kwabesifazane asebedlulile esigabeni sokuya ezinsukwini, izinhlobo ezithile zamaphilisi ezinesithako i-Estrogen, ziyasiza ekuvimbeni ukuba lula kwamathambo okuholela ekwephukeni kwawo ngenxa ye- osteoporosis.
4. Imishanguzo yokunqanda ukukhumuzeka kwamathambo: Isiminingana imishanguzo esizayo evimbela ukuphelelwa kwamathambo yisakhamzimba i- calcium.
Ithambo liyisitho esiphilayo esiqhubeka nokwakheka nokubhidlika ( resorption). I- osteoporosis iqala uma ukubhidlika kwenzeka ngendlela eyedlula ukwakheka kwamathambo. Imishanguzo enomphumela obizwa nge- antiresorptive yehlisa ukubhidlika kwethambo ukuze kuficane nokwakheka kwalo, ngaleyo ndlela bese lwanda uhlonze lwamathambo ( bone density). Umthombo ngabe: medicinenet.com