Ubengaziboni ecula umasikandi njengoba esezifela ngawo
KUNEZINSIZWA ezisencane endimeni kamasikandi elingangatshazwa ikhono lazo, okubonakalayo ukuthi zisazoba yinkinga kulo mculo.
Uma ngikhuluma ngoCelokuhle “Mjikijeli” Gcaba (23) waseMjahweni, eNkandla, maphakathi neKwaZulu-Natal, ngikhuluma ngeciko eligaleleke kwezwakala kuhle kokudilika komgodi. Ezindaweni eziningi lapho kusuke kuhlangene khona abalandeli bakamasikandi, basho ngazwi linye bathi uMjikijeli akafuniseli ngokudlala ingoma emnandi.
Le nsizwa igaleleke kwatatazelwa kumasikandi yadlala ushuni kaMjikijelwa “iChalaha” Ngubane njengoba unjalo. Namhlanje ILANGA likulandisa kancane ngale nsizwa esizakhele igama nakuba igqame kuwona lo nyaka yize sekunesikhathi eside izabalaza. UMjikijeli uma ezishaha uzisho kanjena:
“UMbenyebuli umaqabula ngemvume ematshitshini.
UMjikijeli ojikijele izinsizwa ngengoma kwelikaMthaniya,
Umlilo osha ubuhanguhangu ezintabeni zaseNkandla bahluleka bonke ukuwucisha. Kuze kwalamula ukuna kwezulu.
"Umfana omhlophe ngokwebala nangemisebenzi yakhe emihle.
"Us’dididi esidididini esadida izinsizwa phansi KwaVezunyawo ngengoma.
"Uzalwa bemphika ngoba efana nonina. Ngizalwa yintombi emhlophe eqhamuke kwakhala amazumba. Umshayi wengoma kwajabula iNdidane phansi eStable Theatre. Yathi lo mfana usaya kude”.
Echaza umlando wezihasho zakhe uMjikijeli, uthi ubeqabula ngemvume ematshitshini phambilini ngoba ubengehluleki uma ecela uthando entombini bese konke ekwenza ngokwemvume. Uthi unguMjikijeli oxake izinsizwa ngengoma behluleka bancama ngisho ukumvimba kwelakubo eNkandla.
Utshele ILANGA ukuthi sekukaningi ebadida ngengoma ontanga yakhe ngoba ngelinye ilanga uqhamuke nengoma ye- gospel kanti bebezitshela ukuthi wazi umasikandi kuphela.
“Abafowethu ebesipatanisa nabo umculo, bebengenalo ulwazi lokuthi nginekhono emculweni ohlukene. Mina-ke ekuzalweni kwami bengiphikwa bethi ngifana nomama kanti ngokwejwayelekile ingane ifuza kubo.
"Ingoma sekunesikhashana ngiyishaya, kwayona iNdidane (Mtshengiseni Gcwensa) ingincomile ngonyaka wezi-2012 eStable Theatre, eThekwini yathi iyafisa ukungisiza,” kusho uMjikijeli. Uthi ekukhuleni kwakhe ubecula i- gospel KwaMtshwili Primary
School efunda uGrade-4.
Ngaleso sikhathi ubengawufuni sidalo umasikandi waze waphuma esikoleni samabanga aphansi engazitsheli ukuthi kukhona okungamhlanganisa nawo. Uthi ubevamise ukuvakashela umngani wakhe, onguMavini Skhakhane, othanda omculo wesintu elokhu ewudlala njalo lo mculo uma behleli naye.
Utshele leli phephandaba ukuthi lo mngani wakhe okunguMavini Sikhakhane ubedlala umculo weChalaha isikhathi esiningi waze wawunaka naye lo mculo wezwa ukuthi umnandi nakuba ebengenalo ulwazi lokuthi ngubani lo mculi nokubaluleka kwakhe endimeni kamasikandi.
Uthi uzitshelile enhliziyweni yakhe ukuthi le nto kamasikandi uzoyenza-ke manje ngoba bekuthi uma eseyedwa kubo alokhu ezama ukulingisa ingoma kaMjikijelwa ebidlalwa ngumngani wakhe, wezwa nokuthi iphimbo liyamvumela, angakwazi ukuyenza le nto yenzeke. “Ngonyaka wezi2008, ngixoxe nayo le nsizwa (Mavini) ngathi masihlanganise izingoma ezimbalwa, siziqophe ngoba ibikwazi yona nokushaya intambo. Ngaleso sikhathi ibilokhu ingikhombisa nami ukuthi kubanjwa kanjani uma kudlalwa intambo. "Sizenzile izingoma ezimbili sazibiza ngeqembu oFezela. Besibambisene noStayela Khanyile sidlala ushuni waMageza Amahle kwakucula bona abafowethu phambili nakuba ingaphumelelanga into yethu kodwa besikwazi ukuphromotha ngasekhaya eNkandla sinandisa,” kusho uMjikijeli.
Uthi uhlukane noMavini noStayela waqala ukuzifundisa ukudlala isigingci ezama isitayela sikaMjikijelwa. Esezipatanisela yedwa, wenza i- demo enezingoma ezimbili eyisebenzisa uma kunemicimbi emphakathini. Uveze ukuthi yilapho-ke kuvele khona igama likaMjikijeli ngoba sekukhona abamzwile bathi iphimbo lakhe lincikile kweleChalaha kungcono kanjalo negama lisondelane.
“UMjikijelwa ungihlabe umxhwele kakhulu ngesikhathi ngizwa i-albhamu yakhe ngonyaka wezi-2009. Okungijabulise kakhulu wukuthi nabalandeli bakhe bangemukelile emuva kokuba ephumele obala wathi akanankinga nokuthi ngicula isitayela sakhe.
"Benginovalo lokuphumela emphakathini nalo shuni, ngizibuza ngiziphendula ukuthi ngabe iChalaha lizoyithanda yini le nto. Akukho nami ebengingakwenza, ngiyawuthanda kakhulu umculo wakhe. Okungijabulisayo yindlela abantu abangithokozela ngayo esiteji,” kusho uMjikijeli.
Leli ciko nakuba sekunesikhathi eside lizabalaza ngama- demo ehlathini - ngawo lo shuni - kodwa kalikhohlwa wukubonga uMnu Godolunenkume Shezi obone leli khono wabe eselixhasa njengoba likwazile ukukhipha le albhamu efinyelele emphakathini esihloko esithi “Bayatatazela”.
“Le albhamu ngiyithatha ngo
kuthi ngeyokuqala empilweni yami futhi ngiyafisa abantu bangeseke, bawuthenge umculo wami, bezwe ukuthi ngiphetheni," kusho uMjikijeli.
Le nsizwa ikhuliswe lapho kuzalwa khona uninakhulu ozala unina ngoba unina ubeqhelile kuyona, ethathwe yiGoli.
Uyise oyizalayo ubengahlawulile. UMjikijeli uthi kuthe ngokushona kukaninakhulu nonina, wabona ukuthi kumele ayohlala kubo kayise noma kungakhokhwe lutho ngoba ubengasekho umuntu oseduze kwakhe ngokwempilo ozomlekelela.
Uyise udlule emhlabeni ngonyaka wezi-2013. Unengane eyodwa yomfana okungu-Amandla (9) nezingane zakwabo ezintathu. Esikoleni ushiye phakathi efunda uGrade-10 eSenzakahle High School ngoba esenothando lomculo.