IBE YIMPUMELELO I-1ST WOMEN’S SUMMIT 2017
UMhlonishwa uKhansela uNtombiyenkosi Jiyane onguSomlomo kamasipala uzwakalise ukukhathazeka okukhulu ngokukhula ngesivinini kobugebengu ezindaweni ezingaphansi kukamasipala waseMthonjaneni. UMhlonishwa uKhansela uJiyane uveze lokhu ngenkathi ekhuluma namakhulu omama abebehambele umbango wokugujwa kwenyanga yembokodo obubajelwe eMthonjaneni Indoor Sport Centre. Omama abebekulombungazo bebelandwe ngezithuthi kumawadi angu-13 akhele umasipala uMthonjaneni.
USomlomo ugxeke omama ngokuba abagqugquzeli bokwenyuka kobugebengu, ‘ Singumasipala sikhathazekile indlela ubugebengu obukhula ngayo kulendawo yethu. Okudabukisa kakhulu ngokwezitatimende ezenziwa amaphoyisa nabezobulungiswa ukuthi yithi bomama esinesandla ekukhuleni kwalobubugebengu okukhalwa ngabo. Abezobulungiswa bathi sifike sivule amacala sibuye sizowesula umthetho ungakaqedi ngokudlala indima yawo kulabo abasuke sebeboshiwe. Ngokwesitatimende sabezobulungiswa maningi amacala okudlwengula nawodlame lwasemakhaya esihlala phezu kwawo singawabiki kwabezomthetho. Uma kuke kwenzeka sawabika sibuye sizowesula.
Umeya kamasipala okunguMhlonishwa uKhansela u SBK Biyela enkulumeni yokwesekela lombungazo wembokodo unxuse inzalabantu ukuba ihlangane yenze imifelandawonye ukuze umasipala ezoyixhasa. UMhlonishwa uMeya ubuye wathembisa abafelokazi ukuthi umasipala uphezu kohlelo lokubelekelela nabo ukuze bakwazi ukuziphilisa njengoba bengasenabo ababondlayo. Ubuye waveza ukuthi uhlelo lukamasipala lokulekelela intsha engasebenzi ngokuyisiza ukuba ithole izincwadi zokushayela luhamba kahle, uhlelo lokusiza intsha esiyithatha kuwo wonke amawadi ethu angu13 ukuba iyothatha izincwadi zokushayela luhamba kahle. “Ngiklhuluma nje khona asebezitholile kanti abanye basafunda. Nangonyaka ozayo sizophinde sisize abanye. Nohlelo lokunikezela ngosizo lokuyofunda ezikhungweni zemfundo ephezulu kulabo abasuke bephase kahle ibanga leshumi nalo lusazoqhubeka kuyo yonke leminyaka esisalele sisemandleni” kuthembisa uMeya uBiyela.