UMASIPALA USABELE KWELOMKHOSI WOMHLANGA

UMASIPALA

waseMthonjaneni usuqinisekise omama abahlola izintombi ukuthi uzohlonipha lezozintombi esezihambe indima ende ekuzigcineni ziyizintombi nto futhi ziyinxenye yomkhosi woMhlanga oba mi nyaka yonke esigodlweni seSilo samabandla eNyokeni, kwaNongoma.

Lesisithembiso senziwe uMhlonishwa uMeya u-SBK Biyela ngesikhathi enanela esicelweni esenziwe nguNdlunkulu umaNene weNkosi yakwaBiyela kwaSanguye.

Undlunkulu wenze lesisicelo egameni lomama abahlola izintombi ngesikhathi lomasipala obukeka uhamba phambili ekwesekeleni imikhosi yamasiko kade wenze indumezulu yomcimbi wokuvalelisa izintombi ebezilibangise emkhosini womhlanga obusesigodlweni seSilo samabandla. UMhlonishwa uMeya ephendula enkulumeni kamama uNdlunkulu uthe isicelo sikhe bazosibheka bewumasipala ukuthi akukho yini abangasiza ngakho.“Ngizohlangana nobaba uSibiya ongumenenja kamasipala, ngenhlahla sinaye lapha njengoba nimbona ulalele. Sizoke singqumuze sibone sizifeza kanjani nini lesi sicelo osenzile mama wesizwe. UMhlonishwa uMeya utuse kakhulu Isilo ngokusingatha umkhosi woMhlanga, ‘Kumele sishayelwe ihlombe iSilo ngokuvuselela leli siko ngoba lineqhaza elikhulu elilibambile ekwakhiweni kwesizwe.

Yingakho singumasipala waseMthonjaneni sikusho singahlonizi ukuthi siyohlale sisesekela njalo iSilo samabandla kuyo yonke imikhosi yokuvikela isizwe njengawo lona womhlanga’ kuchaza uMhlonishwa uMeya.

UMHLONISHWA uMeya uMhlonishwa u-SBK Biyela, uSekela Meya uMhlonishwa uPhumlani Ntombela, uSomlomo kamasipala okunguMhlonishwa uNtombiyenkosi Jiyane behola ithimba lezintombi zomhlanga ebeziviliyela zilungiselela ukuya emkhosini woMhlanga eNyokeni...