ISINQUMO SENKANTOLO NGEPOLITIKI NOMTHELELA KWEZEMIDLALO
UKULAHLWA ngecala yiNkantolo yaseMgungundlovu kobuholi beAfrican National Congress (ANC) baKwaZulu-Natal kukholakala ukuthi yikona okuholele ekutheni angalubhadi uNgqongqoshe WezeMidlalo wesifundazwe kumaGolden Games aqale ngoLwesibili asongwa ngoLwesithathu Ogwini Sports and Leisure Complex, ePort Shepstone.
Nakuba le midlalo ihlelwa nguNgqongqoshe WezeMidlalo wesifundazwe, uBongi Sithole-Moloi, ngokubambisana noWezokuThuthukiswa koMphakathi oholwa nguWeziwe Thusi noWezeMpilo kaDkt uSibongiseni Dhlomo, kodwa akekho noyedwa ungqongqoshe olubhade kuyona.
Ngaphambi kwale midlalo, uSithole-Moloi uhlabe ikhwelo ukuba le midlalo isekwe.
Nokho iNkantolo eNkulu yaseMgungundlovu ngoLwesibili ichithe ubuholi obumfake kulesi sikhundla okukholakala ukuthi yilesi sizathu esenze akaze abonakala kule midlalo.
Ubuholi buthi buyaledlulisa lolu daba.
Yize bengafikanga ongqongqoshe kodwa imidlalo iqhubekile kwanqoba iKing Cetshwayo Municipality.
Kule midlalo bekugaduliswana kwezokugijima, kunobhutshuzwayo kwabesilisa nakwabesifazane, iJuskei, iDuck Walk, iDress Up, iBall Throwing ukubala nje embalwa.
Le midlalo idlalwa ngabantu abaneminyaka esuka kwengama-60 kuya phezulu ngenhloso yokugcina imizimba yabo iqatha ukuxosha izifo.
Okucacile kule midlalo wukuthi ikhona intsha engadlela ogageni kogogo nakomkhulu ikakhulukazi kwezokugijima.
Imidlalo kazwelonke kuthiwa izobanjelwa KwaZulu-Natal endaweni engakadalulwa kusuka mhla zingama-23 kuya zingama-27 kuMfumfu (October).
Imiphumela ihambe kanje: (1) King Cetshwayo; (2) Ilembe; (3) iTheku; (4) Ugu; (5) uThukela; (6) iHarry Gwala; (7) uMgungundlovu; (8) Zululand; (9) uMzinyathi; (10) AmaJuba; (11) uMkhanyakude.