INGQWELE YE-COMRADES IHLABANE NGO-R100 000
UGODUKE no-R100 000 uBongumusa Mthembu kwiKwaZulu-Natal Sports Awards ngoLwesihlanu ebusuku eNkosi Albert Luthuli International Convention Centre (ICC), eThekwini.
UMthembu oyingqwele yeComrades Marathon yanonyaka, uhlabane ngomklomelo weSports Personality of the Year ohambisana nesamba sika-R50 000. Lapha unqobe ngokuvotelwa kakhulu.
Akagcinanga lapho njengoba ebuye wa- hlabana ngoweSportsman of the Year nawo ohambisana no-R50 000 nezindondo zakhona.
Ngaphandle kokunqoba iComrades, uMthembu uzakhele olukhulu udumo kuleli ngesikhathi ebuya nendondo yesiliva kwiWorld 100km nyakenye eSpain waphinde wangena nabokuqala abali-10 kwiTwo Oceans Marathon.
UMthembu ubonge kakhulu uhulumeni waKwaZulu-Natal ngalo mcimbi.
Uthi lokhu kuzokhuthaza kakhulu nabanye abasubathi ukwenza kahle. Uphinde wabonga kakhulu kwabamvotelile.
UBongiwe Msomi odlalela iqembu lesizwe leNetball, iSpar Proteas, uthi ukuklonyeliswa kwakhe kuzogqugquzela namanye amantombazane ukubamba iqhaza kwezemidlalo.
UNgqongqoshe WezeMidlalo wesifundazwe uBongi Sithole-Moloi, uthe lo mcimbi ngowokubonga bonke abadlali baKwaZuluNatal abenze kahle kuleli naphesheya kwezilwandle.
U-Aleck Skhosana we-Athletics South Africa (ASA), uhlonishwe ngeMEC Honours Awards ngokuletha uzinzo kule nhlangano ebihaqwe yizinkinga phambilini.
I-ASA ibuye ikleliswe kunombolo 3 emhlabeni kwi-International Association of Athletics Federation (IAAF) World Championships muva nje eLondon.
Lesi sikhulu sisanda kuhlonishwa yi-IAAF ngo-kwenza okufanayo kwi-ASA kanti omunye ohlonishwe ngungqongqoshe nguMick Winn othole iLifetime Achievement Award.
UWinn kuningi akwenzile kwezemidlalo waphinde wagijima iComrades Marathon amahlandla amane.