LICELE IMPINDA IBHOKISA ELIZIBONA LIBANJWE INKUNZI
LICELA impinda ibhokisa elihluleke lancama ukuphula irekhodi lokungehlulwa likaGennady “GGG” Golovkin waseKazakhstan, e-Asia, oyingqwele yomhlaba yeMiddleweight.
USaul Canelo Alvarez waseMexico uzame konke ukuguqisa uGolovkin empini ebiseLas Vegas, e-USA, izolo ngeSonto ekuseni ngokwesikhathi saseNingizimu Afrika kodwa amajaji ahlukana phakathi ngomphumela njengoba amabili enqobise la mabhokisa ngokwahlukana kwathi elesithathu lathi alwe ngokulingana.
Lokhu kwenze ukuthi uGolovkin, ophethe amabhande ahlonishwayo emhlabeni esigabeni se- middleweight, wawavikela ngempumelelo. Kula mabhande awaphethe kubalwa eleWorld Boxing Association (WBA), eleWorld Boxing Council (WBC), eleInternational Boxing Federation (IBF) nele-International Boxing Organisation (IBO).
Emuva kwale mpi u-Alvarez uthe ufuna impinda. Uthi kumele kucace ukuthi nakuba amabhande egoduke noGolovkin kodwa akazange amehlule njengoba amajaji ebanike amaphuzu alinganayo ngokwehlukana.
NoGolovkin uthe akanayo inkinga yokuphinda abhekane futhi naleli bhokisa.
UGolovkin akakaze ehlulwe selokhu engene esibhakeleni esikhokhelayo.
Le mpi ibibhekwe kakhulu kanti kayiphoxanga nakancane njengoba u-Alvarez evuke umbhejazane emizuliswaneni emithathu yokugcina okwenze abalandeli bachazeka ngezibhakela zakhe.
Lokhu kwenze womathathu amajaji amnika yona imizuliswano emithathu yokugcina ukuthi uyinqobile. Ngaphambi kwemizuliswano emithathu yokugcina ku- kholakala ukuthi uGolovkin ubehamba phambili ngamaphuzu angama-218 kwali-169 abesaqoqwe ngu-Alvarez.
“Nakanjani ngiyayiphonsa inselelo uma abantu befuna ukubona impinda,” kusho u-Alvarez okholwa wukuthi bekumele adle ubhe- du njengoba ezwakalise ukuthi unqobe okungenani imizuliswano eyisi-7 noma eyisi-8 kweli-12 abayilwile.
UGolovkin uthe: “Bheka amabhande asekimina. Ngiseyingqwele namanje. Impela ngisayifuna impinda.”Lo mphumela ushiye uGolovkin elwe ngokulingana kanye ezimpini ezingama-37, kwathi u-Alvarez walwa ngokulingana kwezimbili wase ehlulwa kweyodwa kwe-zingama-49. Wahlulwa nguFloyd “Money” Mayweather ngowezi-2013.