Owodumo kwiBucs ubabaza ikhono eKZN
Kunabadlali azobahambisa kwiWits nakwiDowns
UBABAZA ikhono alibone kwiBig 5 Hlabisa Mayoral Cup uHelman “Ncane” Mkhalele wodumo kwiOrlando Pirates nakwiBafana Bafana.
UMkhalele oyiphini likaThabo Senong ololonga AmaJita (SA U/20), ubeyingxenye yalo mqhudelwano obungoMgqibelo eNkosi Nkanyiso Stadium, eNhlwathi, KwaHlabisa.
UMkhalele waseNewcastle, ubezoqoka isikwati esizohlelelwa imidlalo nezikwati zeMultiChoice Diski Challenge (MDC) zamakilabhu ehlukene agijima kwi-Absa Premiership.
“Baningi abadlali abahle engibabone kulo mqhudelwano. Abanye ngizobayisa emakilabhini enginobudlelwano nawo njengeBidvest Wits neMamelodi Sundowns.
"IKwaZulu-Natal ibusisiwe ngokuba nokhilimu wabadlali abanekhono eliyisimangaliso.
"Kuwumsebenzi wethu ukuvundulula ikhono bese silipholisha ukuze kuzuze amaqembu esizwe,” kusho uMkhalele odlalele kuleli iJomo Cosmos nePirates kanjalo namakilabhu aseTurkey.
UMkhalele ubebambisene noBongani Yengwa ukuqoka lesi sikwati.
Le midlalo ibihanjelwe yizingwazi okubalwa kuzona uSiyabonga “Nsimbi” Sangweni wodumo kwiLamontville Golden Arrows, kwiPirates nakwiBafana Bafana noSthembiso Ngcobo odume kwiKaizer Chiefs.
Kulo mqhudelwano kuphinde kwaqwashiswa umphakathi ongomakhelwane ngobumqoka bokuvikelwa kobhejane okudla lubi ukubulawa kwabo kuleya ndawo eneziqiwi okubalwa kuzona iHluhlulwe-Imfolozi Park, iPhinda neThanda Game Reserve.
Isikwati samaZulu FC seMDC sidlulile kulo mqhudelwano njengoba besidlala nePlatinum Stars izolo ngeSonto oNdini.
URonnie Moroka ololonga isikwati soSuthu seMDC, uthembise ukuthi kukhona abadlali afuna ukubahlolela eduze ababone kulo mqhudelwano.
Umdlalo woSuthu wasoNdini uphasiswe yiPremier Soccer League (PSL) ngemizuzu yokugcina njengoba ibuwuchitha phakathi nesonto ikhala ngesimo senkundla yakhona, uLundi Regional Stadium.