UMZEKEZEKE MSHENGU KWIMOTSEPE LEAGUE
BASAYINISE abadlali abanesipiliyoni omakoti beSouth African Football Association (Safa) KwaZulu-Natal ABC Motsepe League ngethemba lokulwela ukuqeda bebalwa namakilabhu amane aphezulu kwi- log yalesi sigaba.
ILANGA lithole ukuthi iSummerfield Dynamos - esanda kuthenga ilungelo leSobantu Shooting Stars yaseMgungundlovu lokudlala kulesi sigaba - isayinise uThokozani “Mzekezeke” Mshengu noMthunzi Mlotshwa bodumo lokuhlikihla ibhola kwiLamontville Golden Arrows kwi-Absa Premiership.
Laba badlali kulindeleke ukuba bafake omkhulu umdlandla kubadlali abasebancane kule kilabhu ezozinza eChatsworth Stadium.
UFalcon Rose ocija le kilabhu, utshele ILANGA ukuthi kabazile ukuzosinisa amahleza kulesi sigaba.
“Sizimisele ngokuqeda sibalwa namakilabhu akwi- top 4 yize sisaphemba. Sibophele abadlali abanekhono elibabazekayo. UMshengu noMlotshwa sikholwa wukuthi bazobamba elikhulu iqhaza ekufezekiseni izinhloso zekilabhu njengoba benamagalelo aziwayo.
“Amalungiselelo ahamba kahle kakhulu kwazise sesinesikhathi eside siqalile ukuhlanganisa ikilabhu. Okuhle wukuthi imiphumela yemidlalo yethu yobungani esisayigijimile iyagculisa. Nginethemba lokuthi ngoLwesithathu abadlali bekilabhu bazokwenza into yamehlo eChatsworth Stadium kwiNedbank Cup,” kusho uRose.
Kubukeka le kilabhu ilwa nokuthola abathandi bebhola baseChatsworth abasale dengwane ngesikhathi iManning Rangers ifadabala kunobhutshuzwayo wakuleli.
Kusenjalo, ibhuntshile imidlalo yeNedbank Cup yalesi sigaba obekumele igijinywe nge- mpelasonto esiphuma kuyona ngenxa yokungafiki kwamakhadi abadlali ngesikhathi.
UZakes Gwala ongumdidiyeli walesi sigaba esifundazweni, uthe le midlalo isizogijinywa ngoLwesithathu.
Le midlalo iqhathwe kanje, kwiGroup A kuzodlala iLadysmith United, iDrakensburg esizokwaziwa ngelePhenduka FC, iMvoti FC neMaritzburg City eKing Edward Park, eGreytown.
KwiGroup B kuzobhekana iSes’khona, iDurban FC, i-Ashley United neKwaMashu All Stars eSJ Smith, eWema. KwiGroup C kuzodlala iGWP Friends, i-Edendale Juventus, iSummerfield neHappy Wanderers eChatsworth Stadium.
KwiGroup D kuqhathwe iNatal United, iMilford FC neKwaDukuza United eDarnall Grounds.