UMDLALI WE-KINGS USESIKAZWA ETHIMBENI LABAQEQESHI
ANGASE azithole esesethimbeni labaqeqeshi umdlali weReal Kings United egijima kwiNational First Division (NFD) okuqale le sizini elimele.
IKings ishayane yaze yabukana ne-Ubuntu Cape Town FC kuba ngu-1-1 koweNFD ngoMgqibelo ntambama eSugar Ray Xulu Stadium, eClermont, ngaphandle kancane kwasePinetown.
USiyabonga “Feleba” Shoyisa odlala emuva kwiKings, akakaze abonakale enkundleni selokhu kuqale le sizini njengoba iqale edonseke inyonga. Nakulo mdlalo ubengabonwa nangokhalo njengoba kuthiwa uxinwe wumkhuhlane.
Ophenyweni olufushane olwenziwe yileli phephandaba, lithole ukuthi uSimo “Govuza” Dladla ocija iKings uhlela ukumufaka ethimbeni labaqeqeshi bale kilabhu ngenhloso yokuzosiza ngenxa yesipiliyoni anaso ebholeni. UDladla udumile ngokunika abadlali ithuba lokuzikhulisa ekuqeqesheni njengoba efake noPhilani “Philoh” Zikalala oke wavimbela i-Orlando Pirates ethimbeni labaqeqeshi bonozinti.
UDladla uvele ujwayele ukusebenza nabantu ake wabaqeqesha abanye babo ubenza izimenenja. Leli phephandaba libuza uDladla ngodaba lukaShoyisa, uqale wangafuna ukuphumela obala ethi usengumdlali. Limumpintshela ekhoneni leli phephandaba ugcine, ethe:
“UShoyisa usengumdlali kodwa ngimdinga nakakhulu ethimbeni lethu labaqeqeshi ngenxa yesipiliyoni anaso ebholeni.
"Ufana noZikalala naye usengumdlali kodwa ubuye alekelele ukucija onozinti.
"UZikalala unenkontileka efana neyami.
"UShoyisa naye usazobonakala eduze kwami,” kusho uDladla.
Ephawula ngomdlalo, uthi ukhathazekile ngerekhodi labo elingelihle lasekhaya selokhu kuqale le sizini.
“Lo mdlalo ube nzima, sizamile ukufuna intuba yokubangena kodwa sangayithola.
"Kodwa-ke umoya obunamandla yiwona osibulele, wenze kwangadlaleka ngoba yiwona obulawula ibhola uliyisa lapho kuthanda khona wona. Ngilidlalile ibhola kodwa bengiqala ukubona into enjena, kangikaze ngidlale esimweni esinjeya.
“Ukuba umoya ungumuntu ubuzokuba ngumdlali ovelele wosuku kulo mdlalo. Kodwa-ke ngikhathazekile ngerekhodi lethu lasekhaya kuzofanele siqale sinqobe imidlalo yethu yasekhaya.
"Sesilahle amaphuzu amaningi kakhulu ekhaya abezosibeka phezulu kwi- log. Sizoyilungisa le nto noma kanjani,” kusho uDladla.