OwePirates ulambele ukudlala kwiBafana
UGabuza udalula okumjabulisayo kwiBucs
UMGADLI oqavile weOrlando Pirates okhombisa izimpawu zokubuyelwa yifomu muva nje uzwakalise ukuthi akakaliphonsi ithawula ngokubuyela eqenjini lesizwe likanobhutshuzwayo laseNingizimu Afrika, iBafana Bafana.
UThamsanqa “Gandaganda” Gabuza ongumgadli weBucs akazange abonakale nhlobo koweBafana Bafana lapho igijime khona imidlalo emibili yokuhlungela iNdebe yoMhlaba neCape Verde Island emasontweni ambalwa edlule ekuhambeni nakuleli.
UStuart Baxter ocija iBafana akazange amfake lo mdlali eqenjini lakhe elihlulwe yiCape Verde ngo-2-1 kuyona yomibili imidlalo. Lo mdlali ekhuluma naleli phephandaba emuva kokuba ezakhe zibambane neMaritzburg United ngo-0-0 kowe-Absa Premiership ngoLwesihlanu ebusuku eHarry Gwala Stadium, eMgungundlovu, ulitshele ukuthi usazongqongqoza kwiBafana.
“Into engijabulisayo njengamanje wukuthi ijezi ngiyalithola ekilabhini, ithimba labaqeqeshi nabalingani bami bayangeseka. Okushodayo nje manje wukuthi ngihlohle amagoli, yiwona engiwafunayo. Ngikholwa wukuthi yiwona azongivulela inhliziyo kaBaxter ukuze angibize eqenjini lakhe. Ngisafuna ukudlala kwiBafana ngoba kuningi kabi engisafuna ukukwenzela izwe lami,” kusho uGabuza.
Lo mgadli odabuka eMnambithi maphakathi neKwaZulu-Natal isikimu bekuhlala kungesakhe ngesikhathi iBafana isalolongwa ngu-Ephraim “Shakes” Mashaba oxoshwe nyakenye esolwa ngokuba luhlaza kubaqashi bakhe, iSouth African Football Association (Safa).
Into engijabulisayo njengamanje wukuthi ijezi ngiyalithola...