UFUNA UKUQOPHA UMLANDO UNXUMALO

UZIMISELE ngokuqopha umlando omusha uPrince Nxumalo ( osesithombeni) wokuba ngumdlali wokuqala we-Ajax Cape Town ukuhlohla amagoli angaphezulu kwangama-20 kule sizini kwiPremier Soccer League (PSL).

Uzwakalise ukuthi lokhu kuzomsiza ukubuyela naseqenjini lesizwe likanobhutshuzwayo laseNingizimu Afrika, iBafana Bafana, elintula umgadli ongalibheki ipali. Lo mdlali uqobele amagoli amabili ezakhe zinquma iPolokwane City ngo-2-0 koweligi ngoLwesihlanu ebusuku eCape Town.

“Ngiyazi ukuthi wonke umdlali unesifiso sakhe kule sizini kwiPSL. Esami ngesokuhlohla amagoli angaphezulu kwangama-20 kule sizini. Ngiqashelwe ukuhlohla amagoli vele. Nginezinhloso ezinkulu kule sizini njengoba ngifuna nokubuyela eqenjini lesizwe,” kusho uNxumalo odabuka eMlazi eningizimu yeTheku.

Uthi ikhefu abazolithola njengoba bengenawo umdlalo phakathi nesonto lizobasiza kakhulu ukulula amamasela ngaphambi komdlalo wangempelasonto abazowugijima neBaroka FC. I-Ajax bekufanele idlale neMamelodi Sundowns ematasa namalungiselelo omdlalo womlenze wesibili wama- quarter-final eCaf Champions League ezowugijima neWydad Casablanca yaseMorocco ekuhambeni. IPlatinum Stars isinabaphathi abasha njengoba kuvele ukuthi seyithengwe nguThabo Makgatle ongesinye sezinjinga zaseRustenburg. Kulindele-ke ukuba izikhulu ezintsha zethulwe ngokusemthethweni ngoLwesithathu.

Kuzokhumbuleka ukuthi kuvelile ngaphambi kokuqala kwesizini ukuthi iPlatinum Stars isikaza ukungena endalini.

Imiphumela yemidlalo yangempelasonto yeMultiChoice Diski Challenge (MDC) imi kanjena: Orlando Pirates Reserves 1, Bloemfontein Celtic Reserves 2; Maritzburg United Reserves 2, Mamelodi Sundowns Reserves 0; Free State Stars Reserves 2, Ajax Cape Town Reserves 1; AmaZulu Reserves 1, Platinum Stars Reserves 1; Polokwane City Reserves 1, Bidvest Wits Reserves 2; Kaizer Chiefs Reserves 0, Baroka FC Reserves 1; Cape Town City FC Reserves 2, Golden Arrows Reserves 2; Chippa United Reserves 2, SuperSport United Reserves 0.