KWEHLISWA AMAPHAPHU ABALANDELI BE-CHIEFS
Makhulu amathuba okubonakala kukaKhune eThekwini
KWEHLISWA amaphaphu kubalandeli beKaizer Chiefs ngokulimala kukaItumeleng Khune ongunozinti wokuqina wale kilabhu.
UKhune ubambe elikhulu iqhaza ekutheni iChiefs ithole amaphuzu agcwele okokuqala kule sizini eqokwa ukuba wumdlali wosuku imidlalo ilandelana kusuka koweCape Town City abayinenebule ngo-2-0 eCape Town Stadium, koweBidvest Wits ababambane nayo ngo-1-1 eGoli nako-weMaritzburg United abayitaxe ngo-2-0 eMgungundlovu.
Lo mdlali uphume ngohlaka ngesikhathi le kilabhu ibambana neLamontville Golden Arrows ngo-0-0 emdlalweni we-Absa Premiership ngoMgqibelo ebusuku eFNB Stadium, eNasrec, eGauteng.
Ushayisane noKnox Mutizwa we-Arrows waphuma ngohlaka okuphoqe ukuthi indawo yakhe ithathwe ngu-Edmore Chirambadare ongumdlali waphakathi. IChiefs ibingeke isakwazi ukuchibiyela ngoBrilliant Khuzwayo ongunozinti ngenxa yokuthi bese uphelile uphawini wokushintsha kule kilabhu.
ILANGA lihabule ukuthi kakukubi kakhulu kuKhune. Kuthiwa makhulu amathuba okuthi abe khona emdlalweni wale kilabhu olandelayo ezodudulana kuwona neBaroka FC ngoMgqibelo ngo18h00 eMoses Mabhida Stadium, eThekwini.
Ngemuva kwalo mdlalo, uSteve “Mphathi” Komphela ocija iChiefs, ukhale ngabanye abadlali bakhe abasole ngokungenwa ngamanzi emadolweni kulo mdlalo. Uthi lokhu akazi naye ukuthi bekudalwa yini.
“Ngibeke ngaphandle uWiseman Meyiwa ngadlalisa uKhotso Malope ngoba ngifuna ukubona ukuthi uphetheni. UBongolwethu Jayiya akasinikanga lokhu ebesikulindele kuyena kulo mdlalo.
Ushaye into ephansi kakhulu. UWilliam Twala bengimfake kuqala isiwombe sesibili ngethemba lokuthi uzokwazi ukugijimisa i-Arrows kodwa kwangenzeka. I-Arrows idlala ibhola elisheshayo futhi iyawaqhulula amagoli,” kusho uKomphela obesanda kuqhuba le kilabhu inqoba imidlalo emibili yePremiership ilandelana ekuhambeni.
UClinton Larsen ololonga i-Arrows naye ucule ingoma kaKomphela njengoba ethi abadlali bakhe babuye bacucuze phambi kwamapali.
“Sisebenza ngabadlali abaningi abasebancane ngeminyaka yobudala. Izinqumo zabo ngiyakwazi ukuzamukela. Sisayikhanda le kilabhu futhi ngikholwa wukuthi luzoqina ukhakhayi kubona,” kusho uLarsen.
I-Arrows izokwamukela iChippa United ngoMgqibelo ngo-15h00 ePrincess Magogo Stadium, KwaMashu.
I-Arrows kayikehlulwa kule sizini emidlalweni yeligi kanti yiyona ezihola phambili kwi-log. Le kilabhu eholwa nguMato Madlala ibuye namaphuzu amane ekuhambeni njengoba ihlule iPlatinum Stars ngo-1-0 eNorth West phakathi nesonto yase ikhempa eGauteng ukulungiselela umdlalo weChiefs.