Sihlabe ukubulawa kosopolitiki iSilo
EZAMAGUGU: EMkhosini weLembe
SIKUBIZE ngoshidi ukubulawa kosopolitiki - okudla lubi KwaZulu-Natal - iSilo, uZwelithini kaBhekuzulu, ngesikhathi sikhuluma eMkhosini weLembe obusezinkundleni zemidlalo eStanger High School, KwaDukuza, ogwini olusenyakatho yeKwaZulu Natal, ngeSonto.
IMbube izwakale inengekile ngesimo esiqhubekayo sokubulawa kosopolitiki esidlangile ikakhulukazi kwelikaMthaniya.
“Lo shidi wokubulalana kosopolitiki kumele uphele manje. Ngiyakuthuma Ndunankulu Macingwane (uMnu Willies Mchunu), utshele umengameli wakho ngalokhu engikushoyo,” kusho iSilo esethule inkulumo sikhungathekile ngokudlula emhlabeni kwabaNtwana basendlunkulu, uMthokozisi noSipho.
Bobabili laba bantwana badlule emhlabeni ngemuva kwengozi yemoto ebehlele ngoMgqibelo belibangise KwaDukuza ukuyokwenza amalungiselelo oMkhosi weLembe.
ISilo sikhale ngendlela amaZulu aseziphethe ngayo kulesi sikhathi.
“Okwenzekayo manje esizweni kubuhlungu ngoba phambi- lini besiyisizwe esaziwayo ngenhlonipho nangokuziphatha kahle. Noma besike siphambane ngemibono kodwa bekungaze kufinyelele kulokhu esikubona kwenzeka njengamanje,” kusho iSilo.
Izinkumbi zabantu ebeziphume ngobuningi bezivunulile, zihuba amahubo ngaphambi kokuba uqale lo mcimbi obuhanjelwe nanguMnu Mchunu, uNdunankulu kaZulu ongumengameli weNkatha Freedom Party (IFP), iNkosi Mangosuthu Buthelezi, uMgcinimafa weAfrican National Congress (ANC), uDkt Zweli Mkhize, uNgqongqoshe wezobuCiko namaSiko KwaZulu-Natal, uNkk Bongi Sithole-Moloi, obengumphathi wohlelo, yizimeya, amakhosi nezinduna.
Izikhulumi okubalwa kuzo iNkosi Buthelezi noMnu Mchunu, zidlulise amazwi enduduzo kwiMbube nasendlunkulu ngomshophi wokudlula emhlabeni kwabantwana.