BAKHALA NGEZIFO ABAHLANZA AWENDLE
ZIKHATHAZEKILE izisebenzi zaseTurton Community Health Care Centre eMzumbe, eningizimu yeKwaZuluNatal, ezithi seziyagula emuva kokuhlanziswa amapayipi endle kulesi sakhiwo sezempilo.
Lezi zisebenzi zithi selokhu ziqale ukwenza lo msebenzi ngowezi-2012, sezingenwe wukugula ezingakwazi, zicabanga ukuthi kudalwa wukusebenza kule ndawo zingazifakile izimfonyo nokunye kokuzivikela.
Zithi okubuhlungu kakhulu wukuthi ngisho zibikela abaphathi ngalokhu kazinakwa. Zitshele ILANGA ukuthi ziphihlika izilonda umzimba wonke, sezize zakhetha nokuyolubika emnyangweni wezezisebenzi udaba lwazo.
UMnu Sthembiso Nyawose - ongesinye salezi zisebenzi - uthi uqashwe kulesi sibhedlela eyokwenza omunye umsebenzi watshelwa esengaphakathi ukuthi kuzomele ahlanze amapayipi endle.
Uthi isimo abebesebenza ngaphansi kwaso kasikho neze sihle njengoba bebengakufaki okokuzivikela. Uveze ukuthi baphile le mpilo iminyaka bexova indle.
“Ukuqala kwami ukusebenza lapha ngitshelwe ukuthi ngizosebenza lapho kuchithwa khona indle yasesibhedlela yize mina bengazi ukuthi ngiqashwe njenge- artison foreman plumber.
“Ngitshelwe ukuthi ngizohlanza le ndawo yendle, ngathula ngoba ngixakekile. Bekunzima kakhulu ukusebenza kule ndawo ngoba bezingekho izinto ezisivikelayo uma sisebenza, ikhemikhali ebesiyisebenzisa ibiyingozi kangangoba ngisho ugqoke izicathulo, beziphela nya ngaphansi.
“Sikubikile ukungenami kwethu kubaphathi kodwa kwazifanela nje. Kuhambe isikhathi sabona kungcono ukuba siyeke ukusebenza kule ndawo ngoba besiphihlika izilonda ezinyaweni nasemzimbeni.
“Inkinga lokhu kugula kakusiyekile, kusaqhubeka. Ngikhuluma nje amehlo ami kawasasebenzi kahle ngenxa yale khemikhali ebesiyisebenzisa, umzimba unezilonda kanti odokotela esike saya kubona bathi lokhu kusebenza kwethu kule ndawo kube nomthelela ekuguleni kwethu,” kusho uMnu Nyawose.
Okhulumela iHhovisi loMnyango wezeziSebenzi KwaZulu-Natal, uMnu Lungelo Mkhamba, uthe lolu daba lubikiwe emahhovisi omnyango asePort Shepstone.
Uthe ziningi izinto ezitholakele eziphambene nomthetho okubalwa kuzona ukungabekwa kwezimpawu zokuphepha lapho kusebenzela khona izisebenzi.
Uveze ukuthi lesi sikhungo sixwayisiwe ngalezi zinto ezitholakele ukuthi kazihambisani nomthetho.
UMnyango wezeMpilo KwaZuluNatal uthe usalinde umbiko ogcwele ovela kulesi sibhedlela bese ukwazi ukuphawula ngalolu daba.
Bezingekho izinto ezisivikelayo uma sisebenza, ikhemikhali ebesiyisebenzisa ibiyingozi, izicathulo...