Iphoyisa livuthele impama kowesifazane
EZOMPHAKATHI: Uvuma ukwamukela isinxephezelo
IGAYA izibozi inhliziyo yowesifazane waseMkhunya, eHighflats, eningizimu yeKwaZulu-Natal othi uthelwe phansi ngempama yiphoyisa elisebenzela esiteshini esiseHighflats mhla zingama-27 kuNcwaba (August) kodwa lisazicanasela, kaliboshiwe.
UNkk Thembi Mpanza (50), uthi leli phoyisa lesilisa limthele ngolabhabha wempama phambi kwezingane zakhe lithi ufihle umsolwa obefunwa ngamaphoyisa. Uze ahlengezele izinyembezi uma elanda ngokuhlaselwa yiphoyisa.
“Ngithe ngizihlalele endlini yami ngabona amaphoyisa ngaphesheya kwasekhaya kungathi kukhona lapho efuna khona. Kube sekungena ubaba omncane wezingane zami endlini waphinde waphuma kungakapheli sikhathi. Nakhona futhi kanginakanga ukuthi kwenzekani, ngiqhubeke nebengikwenza nje ngaleso sikhathi,” kusho yena.
Uthi ngemuva kwemizuzu engaphansana kweli-10, kutheleke amaphoyisa amabili endlini abuza uyise omncane wezingane zakhe - obekade engene endlini wabuye waphuma. “Ngiwatshelile ukuthi impela ungenile endlini waphuma, kangimazi ukuthi ubelibangisephi,” kusho yena.
La maphoyisa uthi ahambile abuya esehamba naye uyise omncane wezingane, abuza uNkk Mpanza ukuthi usifihlelani isigebengu, uwenzelani izilima. Uthi akakwazanga ngisho ukuliphendula lelo phoyisa ngoba elinye - athi belingayifakile into ekhombisa igama lalo - limthele phansi ngempama kwangaba ndaba zalutho.
“Ngikhihle isililo ngoba bengingazi ukuthi ngishayelwani ekubeni bengikhuluma iqiniso ukuthi kangimazi ukuthi uphi lo muntu abemfuna. Okungiphathe kabi kakhulu wukuthi lingishaye phambi kwezingane zami ezimbili, ezigcine sezikhala ngoba zingazi ukuthi kwenzekani,” kusho yena.
Uthi unikele esiteshini samaphoyisa eyobika ngokumehlele. “Umphathi-siteshi ungitshele ukuthi nginelungelo lokuvula icala. Ngilivulile kodwa kuze kube yimanje kakukaze kwenzeke lutho njengoba ngingazi nokuthi kwenzekani ngalo,” kusho yena.
Uthi ngemuva kokulivula kufike elinye iphoyisa ebeliyothatha isitatimende kuyena nezingane zakhe ngoba lithi liphenya ngokushaywa kwakhe.
Utshele ILANGA ukuthi izingane be-zingekho zisesikoleni, okuthe uma sezibuya, indodakazi yakhe eneminyaka eli-17 ubudala (okungedala), yafika yamtshela ukuthi umseshi ufike esikoleni eyothatha isitatimende ngokwenzekile wabe esecela yona ukuba ikhulume naye (Nkk Mpanza), ukuba asule icala ngoba uzakwabo uzimisele ngokumnxephezela.
UNkk Mpanza uthi ugcine ebuzile ukuthi yimalini leli phoyisa elizimisele ngokuyikhokha kodwa kuze kube yimanje akakayitholi impendulo. “Bengifuna ukwazi ukuthi uma bekhuluma ngesinxephezelo bakhuluma ngamalini ngoba nami ngingathandi ukuba (iphoyisa) liphelelwe wumsebenzi njengoba uzakwabo ekhale ngalokho enganeni yami.
"Kuze kube yimanje, kalikaze lisho ukuthi yimalini elizimisele ngokunginika yona. Nalo icala ngeke ngilesule leli phoyisa linganginxephezelelile,” kusho uNkk Mpanza. Uthe imali uyithathiswa wukuthi uxakekile, kodwa kumphathe kabi ukushaywa yiphoyisa engeyena nomsolwa futhi ngenyanga yabesifazane.
“Ungehlise isithunzi ngalokhu akwenzile, ngoba ngixakekile, ngingayithatha imali uma sivumelana bese ngiyalesula-ke icala,” kusho yena.
Okhulumela amaphoyisa KwaZulu-Natal, uCapt Nqobile Gwala, uvumile ukuthi icala livuliwe wathi amaphoyisa ayaphenya kodwa bekungakaboshwa muntu. UMnu Sipho Msimango wenhlangano elwela amalungelo omphakathi, iThokoza Organisation, osebenzisana nalo mndeni, uthi kuyaxaka ukuthi namanje umsolwa akaboshiwe futhi uyaqhubeka nokusebenza.
“Lo mndeni wenzelwa phansi ngoba bakhona ofakazi okwenzeke phambi kwabo lesi sigameko. Ngisho nalo leli phoyisa belingahambi lodwa. Kuyasixaka-ke thina njengenhlangano ukuthi kungani namanje umsolwa engaboshiwe.
"Sengixhumene kaningi nanomphathisiteshi ngimbuza lokho kodwa angakwazi ukungiphendula. Inhlangano yethu ikhonela ukuba abantu besifazane nezingane bangaxhashazwa,” kusho yena.