Isililo ethola igilosa
Lfike nobecula noNcwane
KUVUKE iminjunju wadinda isililo unina kaSfiso Ncwane (ongasekho) obeyisihlabani somculo we- gospel ngesikhathi enikelelwa ngegilosa ngumculi obeyibambe noSfiso, uNkosi Nhlumayo, waseMgababa, eningizimu yeTheku.
UNkz Fikile Ncwane waseMthwalume, ogwini oluseningizimu yeKwaZulu-Natal, wehluleke nawukuzibamba ngoLwesihlanu, washo phezulu ngengila ebona igilosa igcwele imoto.
Ekhuluma neLANGA , uthe inhliziyo yakhe ivele ibe buhlungu uma ebona ukuthi kukhona abasamkhathalele kulokhu kuhlukumezeka okungaka akutholile eshiywa yindodana yakhe ngokukhulu ukuzuma. “Selokhu wahamba uSfiso, ngiphila kanzima ngemali yempesheni.
"Ngisho ngiphukelwe yisicabha ngilala kunjalo ngoba akasekho ebengikhala kuyena ngibone esefika nalokho engikucelile. Kwesinye isikhathi ngize ngifise ukuthi ngabe kungcono ukuba kwafa mina ngoba yena wayengeke ahluleke wukunakekela izingane zakwabo.
"Okungizwisa kakhulu ubuhlungu wukuthi nale gilosa ngiyithengelwe ngumuntu obephila noSfiso, okusho ukuthi indodana yami ibingelona usizo lapha ekhaya kuphela, kodwa ibiwusizo emhlabeni wonke.
"Lokhu kudla kufike ngesikhathi engikudinga ngaso kakhulu, ngiyabonga, ngiswele imilomo eyizinkulungwane. Ukhule Nkosi mfana wami, ngikufisela impumelelo yodwa nasemculweni wakho,” kusho uNkz Ncwane.
UNkosi uthi uNkz Ncwane usefana nonina kuyena kwazise uSfiso ubesefana nomfowabo.
“Ngiqala ukuhlangana noNcwane, bengisafika emculweni ngowezi-2004 ngicula nekhwaya yangakithi, i-Ukukhanya Gospel Group. Besisemcimbini wokuvumbulula amakhono ehholo lase-Adams.
"UNcwane ubengelinye lamajaji kulo mcimbi okuthe uma sesiqedile ukucula, sekuyisikhathi sekhefu, wangibizela eceleni wathi ‘hheyi wena akufanele ngabe ula ngendlela onekhono ngayo’. Siqalile sasebenza ngakhipha i-albhamu yami yokuqala. Ungihlanganise nabantu, wahamba nami uma eyocula.
"EBotswana naseSwazini ngikwazi nje, kungenxa kaNcwane. Ungifundise izinto eziningi emculweni, wukuhlonipha abantu, wukuhlonipha umsebenzi esiwenzayo nokugqoka kahle imbala ngikufundiswe nguyena.
"Ngilapha nje, ngizobona umama wethu, naye uNcwane esaphila ubehlale engitshela ukuthi noma ngingaphumelela kanjani kodwa ngingakhohlwa yimuva lami. Kulokhu okuncane engikutholile ngibone kungcono ngiphe isalukazi sami,” kusho uNkosi.
Lo mculi usekhiphe amaalbhamu amathathu, kumanje umatasa upheka eyesine estudiyo okulindeleke ukuba iphume ekuqaleni konyaka ozayo.
Uthi abantu bazobhema bakholwe kule albhamu njengoba ezokwenza nengoma ezobe ikhuluma ngoNcwane. Upotshozele leli phephandaba ukuthi usezinhlelweni zokubopha ifindo noMaMzulwini naye ongumculi.
Kokuncane engikutholayo ngibone kungcono ukuba ngiphe isalukazi sami.