Umakhalekhukhwini ubaholele kumufi
Kwaboshwa nosolwa ngokumbulala
KUSIZE ukulandelwa kwesiqophamkhondo ( tracker) sikamakhalekhukhwini ukuze kutholakale isidumbu sentombazanyana yaseMabheleni ePort Shepstone, ogwini oluseningizimu yeKwaZulu-Natal, esitholwe ngamaphoyisa ngoLwesihlanu.
UMandisa Mkhize (15), obefunda uGrade 9 eMabiya Secondary School, unyamalale ngoLwesihlanu mhla zili-15 kwephezulu njengoba isidumbu sakhe sizotholwa emuva kwesonto.
UMnu Mzwangezwa Mkhize, onguninalume kamufi, uthi isidumbu sitholwe ngamaphoyisa endawo emuva kophenyo olunzulu obeluhlanganisa ukulandelwa kukamakhalekhukhwini wakhe.
“Emuva kokubheka isonto lonke, amaphoyisa aqome ukulandelela umakhalekhukhwini anyamalale ewuphethe. Uveze ukuthi usetshenziswa ngumuntu wakhona endaweni, amaphoyisa anikela kuyena.
“Kuthe uma emphosa imibuzo, wawayalela umuntu awuthenge kuyena. Aqonde kumdayisi amaphoyisa, wabe eseyowakhombisa lapho ebulalele khona umshana wami,” kusho uMnu Mkhize.
Utshele ILANGA ukuthi isidu- mbu sikaMandisa sitholwe siboshwe ngentambo emqaleni kodwa silele phansi, okwenza basole uku- thi umsolwa usebenzise yona ukubulala umufi.
Uveze ukuthi eceleni kwesidumbu kutholwe isikhindi sikamufi, okwenze basola ukuthi umsolwa uqale wamdlwengula ngaphambi kokumbulala.
“Sibuhlungu ngesihluku asenzile enganeni kodwa siyajabula ukuthi amaphoyisa ambophile. Sifisa umthetho wenze umsebenzi wawo ngenxa yesenzo asenze enganeni yethu ingamonanga ngalutho,” kusho uMnu Mkhize.
Utshele ILANGA ukuthi ngosuku alahleke ngalo uMandisa, ubebuya esikoleni. Kuthe uma kubuzwa omunye umntwana wakulo mndeni ukuthi uphi umufi, wethuka ngoba ezitshela ukuthi ufike kuqala kubo.
“Usitshele ukuthi ubehamba phambidlana kwakhe endleleni bebuya esikoleni. Uthukile uma simtshela ukuthi akakaze afike, saqala lapho-ke ukumbheka ngosizo lomphakathi namaphoyisa kodwa lutho ukumthola,” kusho uMnu Mkhize.
Uthe indawo okutholwe kuyona isidumbu, iyihlathi kanti abantwana baseMabheleni bahamba kuyona njalo uma beya noma bebuya eMabuya Secondary njengoba singekho esinye isikole esiseduze.
Okhulumela amaphoyisa KwaZulu-Natal, uCapt Nqobile Gwala, uthe isidumbu sikamufi sitholwe ngamaphoyisa aseMehlomnyama maqeda abopha umsolwa oneminyaka engama-22 ubudala.
“Umsolwa kulindeleke ukuba avele eNkantolo yeMantshi yasePort Shepstone ngoLwesibili mhla zingama-26 kuMandulo,” kusho uCapt Gwala.