Lukhulu luyeza luyanyelela oGwini
IVALWE ngegiya eliphezulu izolo ehhotela iSt Michaels ePort Shepstone eningizimu yeKwaZulu-Natal ifestivali yamafilimu esidonse iminyaka eyi- hlanu, Ugu Film Festival (UFF) njengoba ivalwe ngefilimu ehlabane ngendondo kwiDurban International Film Festival (Diff) maphakathi nalo nyaka.
Le festivali esungulwe nguMnu Senzo Zindela, ivalwe ngefilimu ethi "Vaya" ka-Akin Omotoso owaziwa kakhulu ngokukhiqiza, ukudidiyela nokuqondisa amafilimu. Ikhuluma ngendlela enamahlaya ngobunzima bempilo edolobheni nokuzama ukuvikela isithunzi somuntu.
Kwi-Diff ihlabane ngendondo yeBest South African Feature Film. Ivulwa ngoLwesine eWild Coast Casino kukhonjiswe ethi "Isivivane sikaShaka" nezama ukuqondisa umlando weLembe, iNkosi uShaka kaSenzangakhona oshicilelwe ezincwadini.
Wumphakathi wezindawo ezakhele iPort Shepstone obambe iqhaza kukhiqizwa le filimu, abalingisi abaphambili baqhamuka eMthwalume.
Le festivali ikhombisa ukukhula minyaka yonke nokuthembisa ukuthi iyoze ifinyelele ezingeni leDiff njengoba isihanjelwa ngabadidiyeli nabakhiqizi bamafilimu abavela emazweni aphesheya kwezilwandle.
Ingqikithi yanonyaka ibithi “Unity is power, writing to restore the original narrative”. Phakathi kwezindawo ezisetshenziswe ukusabalalisa ulwazi nokubuka amafilimu, kukhona neziphakathi ebantwini ngale kwalezi ezisedolobheni, okuyiMthwalume Hall, iGamalakhe Hall neMargate Library. zowakha@ilanganews.co.za