Bebeyibhikla eNkandla abakamasikandi
UGCIZELELE ukubaluleka kwemvelaphi yomuntu nokugcinwa komlando umculi kamasikandi ngesikhathi kugujwa olwamagugu KwaNgono, eNkandla, maphakathi neKwaZulu-Natal, ngoMgqibelo.
UQhoshangokwenzakwakhe “Makhaxambane” Sibisi, odume ngelikaQhosha, ubekhuluma nomphakathi obuhambele lo mcimbi obusezinkundleni zemidlalo eBizimali High School wokubungazwa kwenyanga yamagugu.
Udonse ngendlebe abafundi wathi nakuba befunda kodwa kubalulekile ukuba umuntu angakhohlwa wumsuka wakhe.
“Kubalulekile ukuba sigqugquzele bona abafundi ngokubaluleka kwamagugu ethu yingakho ngisukumele phezulu uma ngimenywa esikoleni esisemakhaya ukuze kube yithina esitshala izithelo ezinhle kubafundi, baqhubeke nokuhlonipha amasiko,” kusho uQhosha.
Utshele leli phephandaba ukuthi yibona abafundi abazokhula baseke umculo wabo. Umphakathi ubuphume ngothi lwawo kanti nomama besigekle bebevunule beconsa.
Umphakathi ubusuqalile ukuhlakazeka kodwa emuva kokuba kumenyezelwe ukuthi sekufike uQhosha - seligamenxe ihora lesine ntambama - kube wububhudubhudu abantu bebuya.
Lesi sihlabani sikamasikandi siqhulule amanoni aso okubalwa kuwona nelithi: “Amavukane asema-ningi".
Isikole besihlabe inkomo kanti abafundi bebenxuswe ukuba bagide ngokwezigodi zabo. Okunye okuvelile wukuthi lo mcimbi usuzokwenziwa minyaka yonke ngenhloso yokuhlanganisa umphakathi.