Ubonga amandla eLANGA
Wenze umsebenzi omkhulu umnyango kaWeziwe Thusi
SIBONGA amandla eLANGA isalukazi saseZamazama eMboza, KwaMhlabuyalingana, enyakatho-mpumalanga yeKwaZulu-Natal, ngokungenelela kwalo enkingeni ebesibhekene nayo sixhashazwa yizisebenzi zeSouth African Social Security Agency (Sassa) ngaphansi kwehhovisi laseManguzi.
Mhla ziyisi-8 kuNhlaba (May) kophezulu, leli phephandaba libike kabanzi ngodaba lukaNkz Nomvula Tryphina Manzini (67) obenenkinga yokungayitholi imali yakhe yempesheni ekubeni isifike yaze yedlula iminyaka ebekiwe.
Uthe izisebenzi zakwaSassa bezivele zimtshele ukuthi ukweleta uhulumeni u-R24 000 awuthole ngendlela engafanele ngesikhathi eholela izipoki imali yeqolo - ngakho-ke ngeke ayinuke impesheni.
Kulapho-ke kungenele leli phephandaba elixhumane nezisebenzi zoMnyango wezokuThuthukiswa koMphakathi KwaZulu-Natal kwaqalwa izinhlelo zokubhaliswa kwemali yalesi saguga.
Lo mnyango wethembise ukuthi uzothatha izinyanga ezintathu ulungisa udaba lukaNkz Manzini - okuyisikhathi ophumelele ukusigcina.
Phambilini okhulumela lo mnyango KwaZulu-Natal, uNkk Ncumisa Ndelu, uzwakalise ukushaqeka ngesimo sikaNkz Manzini wacela ukuthunyelelwa imininingwane ephelele ngenkinga yakhe.
ILANGA likwenzile lokho. Lokhu kuholele ekutheni lo mnyango oholwa nguNgqongqoshe Weziwe Thusi, ugcine umlungisele udaba lwakhe uNkz Manzini njengoba ngoLwesihlanu eshayele leli phephandaba ucingo ebonga kulona ngokusukumela udaba lwakhe.
“Ngicela ukubonga kini nabaphathi benu ngokusukumela udaba lwami. Mina bengihola imali yeqolo kungafanele ngoba abanye behola. Ngesikhathi kuphuma umyalelo othi bonke abaholela izipoki mabesule, ngenze njalo. Ngihlukunyezwe yizingane zakwaSassa kangangokuba ngize ngazisola ukuthi ngawuhloniphelani umthetho wokwesulwa kwezipoki, izingane zibukisa ngami.
"Kumanje ngidlulisa ukubonga kubaba uJohnson Gwala oxhumane nani ( ILANGA) ukuze kuxazululeke inkinga yami. Kubuye ithemba sengibona kufika abantu abathe bazongisiza ukuba ngiyobhalisela imali yami yempesheni.
"Kumanje ngiholile, sengizokwazi ukuphila njengakweminye imizi. Lapha ekhaya ngihlala nabazukulu abayisihlanu abayizintandane, abanye babo kabanabo omazisi okwenza ibe nzima impilo. Ngiyabonga kubaphathi beLANGA nakuzona zonke izintatheli,” kusho uNkz Manzini.