Phuza amanzi ngendlela efanele
UKUPHUZA amanzi abantu abaningi bakuthatha njengento eyinhlalayenza noyenza ngoba uzizwa uwomele. Nokho ukuhlala uwaphuza kunomthelela omuhle nomkhulu empilweni yakho. Yize kumqoka kangaka ukuphuza amanzi, kunesibalo esikhulu sabantu emphakathini esingazikhathazi ngokuphuza ayisilinganiso esifanele ngosuku. Ingxenye elinganiselwa ema-70% yomzimba womuntu ingamanzi, ama-71% obusomhlaba ( surface) imbozwe ngamanzi, mhlawumbe ukuwabona yonke indawo kwenza ukuwaphuza ku- ngabi seqhulwini lezinto ozidingayo.
Abantu, njengoba sekushiwo, ingxenye engama-70% yemizimba yabo ingamanzi, kanti eyegazi ingama-90%.
Asikho isiliganiso osekwavunyelwana ngaso emhlabeni wonke somthamo wamanzi okumele siwaphuze ngosuku.
Amanzi amqoka ukuze izinso zethu zisebenze.
Uma umuntu ephelelwa ngamanzi emzimbeni, uba sengcupheni yokungenwa yizifo zesikhumba nokushwabana.
Emibuzweni yocwaningo kwavela ukuthi ingxenye eyisi-7% yaveza ukuthi kayiwaphuzi nhlobo amanzi. Ukuze konke kusebenze kahle, wonke ama- cell nezitho zomzimba kudinga amanzi. Amanzi lawa asebenza futhi ekwenzeni amalunga angagudlani, kuvikeleke umfunkulu nezinye izingxenye ezibucayi, nokuba izinga lokushisa komzimba lihlale lisendaweni efanele, kanjalo nokuhambisa ukudla emathunjini.
Nakuba ingxenye yamanzi edingeka emzimbeni siyithola ekudleni okunamanzi amaningi; umhluzi (isobho), utamatisi, amawolintshi - ingxenye enkulu siyithola ngokuphuza amanzi nezinye iziphuzo.
Ukusebenza komzimba nsukuzonke kuwenza ulahlekelwe ngamanzi okudingeka amanye endaweni yawo. Nokho-ke iziphuzo ezinotshwala ne- caffeine kaziwulungele zona umzimba.
1. Uma uzizwa ukhathele njalo, kungenzeka ukuba kawuwaphuzi ngokwanele amanzi. Empeleni ukukhathala njalo luphawu oluhamba phambili olubonisa ukuthi umzimba kawuwatholi amanzi aneleyo. Ubuncane bamanzi emzimbeni benza inhliziyo isebenze kanzima, ezinye izitho zomzimba zingasebenzi kahle. Ngakhoke ukuphuza amanzi kakhulu kuyawusiza umzimba ukuba usebenze kahle.
Uma unobuhlungu bekhanda obunganqamuki, into yokuqala ongase uyenze wukuphuza amanzi kakhulu, kwazise ikhanda elibuhlungu sonke isikhathi libangelwa ngamanzi anganele emzimbeni. Ocwaningweni olwashicilelwa yi-European Journal of Neurology, abacwaningi bathola ukuthi ukwandisa umthamo wamanzi owaphuzayo kusiza ekunciphiseni amahora obuhlungu bekhanda.
Amanzi asiza futhi ekusebenzeni komgudu wokudla. Amanzi anganele emzimbeni adala ukuqunjelwa njengoba upopopo (ithumbu elikhulu) liye limunce amanzi etsheni lentaba ngoba lenzela ukuba umzimba ungawesweli. Ngaleyo ndlela ukuzikhulula kube wumqansa. Ukuphuza amanzi aneleyo kwenza umzimba ukwazi ukugaya kahle ukudla, okuholela ekutheni zingathikamezeki izikhathi zokuyozikhulula:- Amanzi afudumele mahle kakhulu maqondana nalokhu. Abacwaningi sebathola ukuthi ukuphuza ingilazi yamanzi ngaphambi kokudla kusiza ekunciphiseni inhliziyo evulekele ukudla ( appetite) bese ngaleyo ndlela kwelekelele imizamo yokwehlisa isisindo. Amanzi agcwalisa isisu, ngaleyo ndlela kunciphe uthando lokudla kakhulu.
Enyusa izinga umzimba oshisa ngalo amafutha. Amanzi amsulwa uma esetshenziswa esikhundleni seziphuzo ezihlwahlwazayo, asiza kakhulu kwazise lezo ziphuzo zinomthelela ekunyuseni isisindo.
Amanzi awumkhucululi ovelele ngoba asiza ekukhuculeni ukungcola emzimbeni ngomjuluko nomshobingo. Asiza ekusebenzeni kahle kwezinso nokuvimbela ukudaleka kwamatshe ( kidney stones) ngokuhlambulula usawoti kuwona umshobingo, okuyikhona okubangela ukudaleka kwamatshe ( kidney stones).