UMONA KUBANTU BAKITHI UYIZINDODLA NJENGEMALI
NGIYE ngizwe abantu bethi umona yifa lezinja, ngisho ngenhliziyo ngithi: “Kwaze kwadlalwa ngezinja zikaNkulunkulu ngoba nakhu zingakwazi ukuzikhulumela, umona yifa lazo nje zazilabelwa ngubani?” Banomona abantu! Bona nje laba bakithi abampisholo, ungafunga ukuthi yibona abadweba uMonalisa!
Umona kubantu bakithi uyizindodla ungathi yimali egcwele u- plastic omnyama iyofakwa ebhanoyini ithunyelwa eDubai ngabangani bakantabakayikhonjwa. Ngike ngezwa isimanga omunye umlisa encoma imoto encane ebihamba elinye ixhegu eThekwini, hhayi kwangehla kahle lokho kumhlobo wakhe abehamba naye - olinganiselwa eminyakeni engama-30 ubudala.
Uzwakale esebhavumula: “Wayebanjwe yini lo mkhulu ukusebenza ukuze athenge imoto yangempela hhayi leli thoyizi ahamba ngalo?” Kwathi mangithi: “Wayebanjwe yile nto ebambe wena njengoba nawe uthwabaza ngezinyawo nje, ufothokhopha umhlabathi.” Hhayi khona, abantu bakithi ngeke nje ube nento bathule bangagxeki.
Umuntu abe nomona aze athakathe! Kungena osofa kwamakhelwane wakhe, yena ushona kuMama uBhilikida oneziqu zokuthakatha, uyofuna umuthi wokuqothula osofa. Ingane yakwamakhelwane i-ne- party yenkukhu, ijabulela ukuphuma u- number 1 kwaform 1, uthi ezakhe izingane mazingayi lapho ngoba le eyakwamakhelwane iphasa ngotokoloshe - kanti usho bafuywe nguyena.
Indlela esinomona ngayo, ngiyesaba nje ukuthi uma singase sibe nethuba lokuthi ama-98% wezitolo ezinkulu aphathwe yithina, i- advertising industry ingaphenduka iNcome - iphenduke igazi!
Uyacabanga nje umalum’ Jamengweni Gumede esewuChristoffel Wiese wakwaShoprite, u-ankel’ Msusuluzi Mkhize ewuGareth Ackerman - kukhala isicathulo sakhe kwaPick ’n Pay - sekwenziwa izikhangiso? Gumede: “Shoprite, lowest prices for all…” Mkhize: “Pick ’n Pay, be happy to pay more because good things come with a price, those who say lowest prices for all, ubohlala wazi ukuthi ithi ingashibha vele iwumbhedo!”
Aphendule uGumede: “Shoprite; Pathetic people like Mkhize who say they are always there for you kodwa uma ubheka, ama- prize abo alungele ongamula…”
Kuhlale kuphikiswana, kuthukwana, kushaywana kudutshulwana. Kangiqambi amanga, buka ukuthi embonini yamatekisi, kumaskandi nakwipolitiki lapho sigcwele khona.
Ematekisini kuke kubangwe umzila wamavondwe indlela yesintu hhayi ngoba kubangwa, wukuthi ukulwa nje sekwaba segazini. Kumaskandi, abantu bake babe nomona nje ukuthi emsakazweni kubizwe umculi othile, bayokhala kuze kubuye umfo kaNaidoo ePhoenix noPien- aar eCape Flats.
Uma-ke kungake kuthiwe nje abantu bamatekisi banikwa ithuba lokukhangisa umsebenzi wabo emaphephandabeni nasemisakazweni, I am sure ungabona isimanga. Kungaqala kahle nje kukhangiswa, uyothi uzwa endleleni, “Gibela amatekisi kaSibiya, obiya ngama-ATM oDlamini bebiya ngehlathi lobukhwebezane.
Uma ugibela amatekisi kaSibiya, ufika lapho uya khona ungakafisi ukwehla kanti uma ugibela akaDlamini, ubona olayini bomgwaqo phansi imoto ihamba. Gibela amatekisi kaDlamini at your risk!”
Kakusikhona ukuthi abantu kabazi ukuthi ukuhlasela imbangi uma udayisa umkhiqizo wakho kuyicala, wukuthi nje umona abantu abaningi usufana namafu eVenus, uwugqinsi, ubamboze ingqondo. Nesimo esiphila ngaphansi kwaso sendlala, ngiyasisola ngokwanda komona.
Phela kakumnandi ukuhlale ukhokha intela kodwa ugibele uphaqa owakhiwe ngevili lemoto kwazisholo umkami, uMa-Mdali - kodwa kukhona abantu abaholela ukuyomemeza nje laphaya ephalamende, abahamba ngezimoto ezigqoke amasondo angange- salary yami.
Ufice umuntu esezace njengesikelemu esine- kwashiokor - kangazi noma siyaba nayo yini - somuntu osezile ukudla amasonto amabili, ngenxa nje yomona. Uthole uxamu wevila, onqena ngisho ukugeza ubuso bawo, unomona ukuthi uzakwabo okhuthele ukhushulelwe esikhundleni.
Umuntu-ke useyogijima bonke abathakathi laba baze badlule isikimu se- rugby ezama ukuloya le ngane yabantu esebenza ngokuzikhandla. Yekani umona bazalwane ngoba uzozibona ushaya ngethangi lesisu, usunguMampintsha Wodumo uzitshele ukuthi ukhuluphele kanti yi- stress somona. Hikhensile ngopfu!