Kayizange ibuse ngokuthula iNkosi yamaHlubi
Yayihlushwa ngoba izilungele
ISIZWE samaHlubi (oHadebe), sinjengomoyampilo ( oxygen) wona okhona kuyona yonke indawo eMhlabeni - sitholakala kuzona izingxenye zeNingizimu Afrika.
Sikhona eNorth West, eMatatiele, eWestern Cape, e -Eastern Cape kanti ikomkhulu laso liseMtshezi, maphakathi neKwaZuluNatal. Minyaka yonke ngoMfumfu (October), amaHlubi abhekisa amabombo esigodlweni saKwaBhekuzulu, eMtshezi lapho ehlangana khona ngaphansi kwenkosana yawo wonke, iNkosi Mzwenkosi kaTatazela kaSiyephu kaLangalibalele kaMthimkhulu kaBhungane Hadebe.
INkosi Langalibalele kaMthimkhulu, yiyona eyenza lesi sizwe sagqama ngendlela eyahlupheka ngayo isilwela. UMbuso wamaNgisi wawungawafuni nokuwabona amaHlubi yize kwase kuyisizwe esasesifakwe ngaphansi kwawo.
Umbuzo uthi, iNkosi Langalibalele KaMthimkhulu nesizwe samaHlubi baze bahlushwe kangaka nje, bedlelwa imfuyo, beboshwa, bephucwa umhlaba bebulawa, babenzeni.
Impendulo ithi, lesi sizwe sasicebile ngemfuyo, sinomhlaba onothile futhi sikhuthele. INkosi Langalibalele yayinomoya omuhle, imnene ngokwendalo, ingezwani nezimpi nokuxabana nezizwe nabantu eyayakhelene nabo.
AmaHlubi ayethe chithisaka enyakatho neNatal naphakathi nayo iminyaka eminingi. Izinkomo zamaHlubi zazibulala inyoka emzileni ngoba zazisuka emfuleni uMnambithi (Klip River) zize ziyoshaya KwaNobamba (Weenen), zisuke lapho ziyovala ngezintaba zoKhahlamba (Giant Castle) emngceleni wabeSotho.
AmaHlubi ayenomhlambi wezinkomo ezibomvu (umtshezi). Umhlambi wezinkomo ezimnyama KwaZulu kuthiwa yindl’ ivaliwe, owezimhlophe kuthiwa yinyonikayiphumuli (amalanda), owezimbomvu kuthiwa wumtshezi - lezi ezazifunywe ngamaHlubi.
Isizwe sa-KwaZulu kusaphethe iSilo uShaka kaSenzangakhona, kasikaze siwahlasele amaHlubi, esikhundleni salokho kwakunobudlelwano obuhle kulezi zizwe zombili. INkosi Dingiswayo Mthethwa (uGodongwane) yabaleka yayocasha emaHlutshini, yabuyela kwaMthethwa isigibele ihhashi iyothatha ubukhosi.
Yiyona futhi iNkosi Dingiswayo eyakhulisa iLembe, iSilo uShaka. Ngesikhathi iNkosi Zwide kaLanga Ndwandwe isibulale iNkosi Dingiswayo, iSilo uShaka sahlomisa amabutho aso kwayolwiwa noZwide.
ILembe lathola ibutho lasemaHlutshini elalaziwa ngokuthi yiZiyendane zikaNandi, okwakungelezinsizwa ezisezintsha, linejubane elimangalisayo futhi lingahlehli empini. Yingakho kusekhona nesigodlo saKwaBhekuzulu namanje, ikomkhulu lalesi sizwe. UMbuso wamaNgisi wawungawafuni amaHlubi ngoba ayengafuni ukuyosebenza emapulazini, egabe ngokuthi anemfuyo. AmaHlubi ayencamela ukuyosebenza ezimayini zedayimane ngoba kwatholakala idayimane eKimberly, (eNorthern Cape njengamanje) ngonyaka we-1867. Ayebuya nezibhamu ezimayini, okwakwenza amaNgisi azizwe engavikelekile, esaba. IMatshi yaseMtshezi (Escourt), uMnu John Mcfarlane, yathumela eNkosini Langalibalele ukuba iqoqe zonke izibhamu ezazikubantu bayo. INkosi yamaHlubi yenqaba yathi izibhamu ngezabantu bayo hhayi yona. Yabizwa eMgungundlovu ngoMbasa (April) we-1873 ibekwe icala lokuvukela umbuso. Yayilimele emlenzeni, iqhuga, ingakwazi ukuhamba kahle. NgoNhlaba (May) ngawo owe-1873, amasosha amaNgisi ayeholwa nguSir Benjamin Pine, ahlasela isizwe samaHlubi. USir Benjamin Pine, wayaziwa ukuthi uyabahlukumeza abantu abamnyama, wayesanda kugasela emzini waseThembeni (ePinetown njengamanje), umuzi weNkosi uDabeka kaDube kaSilwane Ngcobo. Lo muzi weNkosi uDabeka wawuphesheya komfula uMngeni. USir Benjamin Pine wakha elakhe inxuluma eThembeni njengoba sekunedolobha namanje elibizwa ngePinetown, elisentshonalanga yeTheku - eliqajwe ngenxuluma likaSir Benjamin Pine. USir Pine ngesikhathi ehlasela amaHlubi, wayehlose ukuqoba avungule kulesi sizwe ngoba wafika namabutho amasosha iNatal Native Levies, iRichmond Mounted Rifles, iKarkloof Troops neNatal Caribineers eholwa nguMajor Antony Durnford. Izibhamu ezaqoqwa emaHlutshini zili111, zingama-48 kuphela okwatholala ukuthi zinamaphephamvume. Ngemuva kokuhlaselwa, amaHlubi aphoqwa ukuba yizigqila ezweni lawo. INkosi Langalibalele yahamba yayocasha kubeSotho ibalekela ukwethweswa icala lokuvukela umbuso futhi. Izinkomo ezaphangwa ngamasosha amaNgisi kwakungezona ezamaHlubi kuphela kodwa nezesizwe samaNgwe (abaKwaMazibuko) esasakhelene namaHlubi zathathwa. INkosi Langalibalele yagcina isibuyela ezweni layo yaboshwa ngaphansi kweNatal Criminal Act, yayiswa eRobern Island.
Amakholwa ayakhelene nesizwe samaHlubi, kawazange ayisize iNkosi Langalibalele ngaphandle koMbhishobhi we-Anglican Church, uWilliam John Colenso (uSobantu). Kunencwadi eyabhalwa nguMnu B Cole ethi “Langalibalele and amaHlubi Tribe” etholakala eDon Africana Library, eThekwini, lapho kuchazwa ngokuhlupheka kweNkosi Langalibalele nosizo eyalunikwa nguSobantu.
Nguyena uSobantu owabhalela ikomkhulu loMbuso wamaNgisi, eLondon, enxusa ukuba kukhululwe iNkosi Langalibalele ngoba yayingenacala ngokwakhe. Wabhala futhi uSobantu wathi makukhululwe neSilo uCetshwayo kaMpande esasiboshelwe epulazini lewayini eWestern Cape, i-Ode Molen.
ISilo uCetshwayo saboshwa ngemuva kwezimpi zikaZulu namaNgisi zangonyaka we-1879. Sagcina sivunyelwe okuyobonana noNdlunkulu wamaNgisi, uVictoria phesheya kwezilwandle, iNkosi Langalibalele yakhishwa eRobern Island yayiswa epulazini i-Uitvlugt manje osekuthiwa yiGarden City of Pinelands, eWestern Cape.
Yahlala isikhathi eside iNkosi Langalibalele idingiselwe eCape Town njengoba kunelokishi elikhona manje elaqanjwa ngayo, okuthiwa yiKwaLanga. Ngenxa yokushabasheka kukaMbishobhi uSobantu, iNkosi Langalibalele yagcina isidedelwe yabuyiselwa esizweni sayo samaHlubi, eMtshezi nasezintabeni zoKhahlamba.
Yadedelwa ngonyaka we-1887 vele isidunguzela. Yafika isizwe samaHlubi siyilindele kwaba nemicimbi emikhulu yemukelwa, isizwe sisayithanda iNkosi Langalibalele. Le nkosi kayizange ibuse ngokuthula nangokunethezeka, ihlushwa yiSilo uMpande namaNgisi ngoba izilungele.
Yakhothama ngonyaka we-1889. Ngesikhathi itshalwa, kwenzeka into engajwayelekile emaHlutshini, induna uMbongwa eyayingundunankulu yayitshethe isidumbu senkosi ihamba iyibongela, yangena naso edwaleni elavele laqhephuka. Idwala lavele lavaleka.
Kuthiwa induna uMbongwa kayibange isaphuma kulelo dwala eselithathwa njengedlinza leNkosi Langalibalele njengamanje.
Induna uMbongwa yayendlalela iNkosi yamaHlubi. UMasipala waseMtshezi (e-Estcourt neLoskop) uqanjwe ngokuthi yiNkosi Langalibalele Local Municipality, uku-hlonipha iNkosi yamaHlubi.