Ikhonjwa e-England impi yamabhokisa akuleli
UTete uzovikela ibhande leWBO kuGonya
IKHONJWA e-England impi yebhande leWorld Boxing Organisation (WBO) Bantamweight, phakathi kwengqwele, uZolani Tete waseMdantsane noSiboniso “Tiger” Gonya waseMtubatuba ogwini olusenyakatho-mpumalanga yeKwaZulu-Natal.
Le mpi kuthiwa izokuba ngoMgqibelo womhla zili-18 kuLwezi (November) e-England. Ihlelwa nguphromotha kaTete ozinze kuleliya lizwe. UGonya uyingqwele yeWorld Boxing Association (WBA) Pan African Bantamweight futhi uphethe ibhande leWBO Inter Continental esigabeni esifanayo.
Ukleliswe endaweni yesithathu kwabagaqele ibhande likaTete. Le mpi bekulindeleke ukuba ibe kuleli kodwa ukungabi bikho kwabaxhasi, kuthiwa yikhona okuholele ekutheni iyiswe e-England.
UThulani “Nkunzi” Magudulela weLudonga Boxing Promotions, uthi bavumelene nophromotha kaTete ukuthi le mpi isingathwe phesheya kwezilwandle.
“UTete nguyena onegunya lokuzitomulela ibhokisa afuna ukulwa nalo kwaklelisiwe. Utomule uGonya naye wakwamukela lokho ngoba usigaqele lesi sicoco.
"Umuntu onegunya lokusho ukuthi impi kumele iye kuphi, ngumgqugquzeli wezimpi zikaTete ngoba nguyena ophethe ingqwele.
"Thina siphonse inselelo ngakho kumele sivumele lokhu esitshelwa khona. Bonke abantu abathintekayo kule mpi bebefuna ukuthi ibe kuleli kodwa kwangenzeka,” kusho uMagudulela.
UTete ugcine ukungena eringini ngasekuqaleni kwalo nyaka ehlula u-Arthur Villanueva eLeicester City, e-England. Ngaphambi kwalokhu, ubehlule uVictor Ruiz eLiverpool kulona leliya lizwe. UGonya ugcine ukungena eri- ngini ngasekuqaleni konyaka ehlula u-Immanuel Naidjala waseNa- mibia ekuhambeni. Ngaphambi kwalokhu ubebukise ngoGianpie- tro Marceddu wase-Italy.