IQEDE ISHOBOLO LOKUNGANQOBI IRICHARDS BAY FC
IKHIPHE ishobolo iRichards Bay FC nakuba iqede umdlalo ingasaphelele kukhishwa ngekhadi elibomvu uHoward Davids, oyisitobha ngesikhathi iqoqa amaphuzu amathathu okokuqala kule sizini ihlula iTshakhuma Tsha Madzivhandila ngo-3-1 ovuthayo koweNational First Division (NFD) izolo ngeSonto ntambama eMhlathuze Sports Complex, eRichards Bay.
IRichards Bay inqobe ngamagoli kaMichael Gumede, uThabiso Nkoana nelikaSiphelele Mkhulise. URoger Sikhakhane ongumqeqeshi weRichards Bay ubephuphuma injabulo ngalo mphumela ngesikhathi ekhuluma naleli phephandaba emuva kwalo mdlalo.
“Kube yinto enhle kakhulu ukunqoba lo mdlalo. Bekumqoka kakhulu ukuthola amaphuzu agcwele ikakhulukazi njengoba besidlalela ekhaya. Kungiphathe kabi ukuthi siqede umdlalo si- ngasaphelele.
Nakuba ngingezwani nokukhuluma ngezinqumo zonompempe kodwa kasingiphathanga kahle esaleli khadi,” kusho lo mqeqeshi ohole nge-mpumelelo iThanda Royal Zulu inqoba lesi sigaba ngesizini edlule.
Icazelane amaphuzu kunzima iJomo Cosmos neUbuntu Cape Town kuba ngu-1-1 koweNFD izolo eCape Town.
URanga Chivaviro weUbuntu ubulale ngomzuzu wama-64 igoli likaLinda Figo Mntambo wezeNkosi ovule inkundla ngowama-23.
Isiyonke imiphumela yeNFD: Stellenbosch FC 1, Cape Town All Stars 0; Mbombela 1, Highlands 0; Royal Eagles 1, Super Eagles 1; Witbank Spurs 1, Pretoria University 2; Leopards 0, Kings 0; UThongathi FC 1, Mthatha Bucks 2; Richards Bay 3, Tshakuma FC 1; Ubuntu 1, Cosmos 1.