ISIQASHE USIPHO ZIMBA I-NATAL UNITED

INATAL United yaseMsinga ilande uSipho Zimba obesethimbeni labaqeqeshi beThanda Royal Zulu ebigijima kwiNational First Division (NFD) ngesizini edlule.

IThanda kuphelile ngayo emuva kokuba inyukele kwi-Absa Premiership yabe seyidayisa ilungelo lokudlala kulesi sigaba kumaZulu FC. ILANGA lihoshe ukuthi iNatal kaSenzo Sokhela isilande uZimba ukuyocija onozinti.

UZimba uqale ngeledlule ukubamba izintambo kwiNatal kanti nangoMgqibelo beziphethwe nguyena izintambo le kilabhu icazelana amaphuzu ne-Ashley United kuba ngu-1-1 eSJ Smith Stadium, eWema. USokhela ebuzwa yiLANGA ngezinhlelo zale kilabhu njengoba bethenge isitifiketi soThukela FC ngokuqala kwesizini, uthe: “Ngikholwa wukuthi seku- yisikhathi sokuba amakilabhu abambane ngezandla. Uma kukhona onekhongco elibuthaka kumele kusizwane.”

Kuzo ezeMotsepe League, uKenny Ndlazi utshele ILANGA ukuthi nakuba ebonakele kwiHappy Wanderers kodwa akaqashiwe kuyona ubezosiza nje ngezinto ezimbalwa umnikazi wayo, uMzakes Walaza Nxumalo ezeseka ngokuthi bangabangani abakhulu.

IMilford FC iwole amaphuzu agcwele ingazange iwajulukele igingqela iKwaMashu All Stars ehlulekile ukufika enkundleni. Lo mdlalo bekumele ube ngoMgqibelo eMhlathuze Sports Complex, eRichards Bay.

Isiyonke imiphumela yemidlalo yeSafa KZN ABC Motsepe League ihambe ngalolu

hlobo: Drakensburg FC 1, KwaDukuza FC 0; Edendale Juventus 2, uMvoti FC 4; Pmb City 0, Ladysmith United 0; GWP Friends 1, Dbn FC 2; Ashley 1, Natal United 1.

I-Ashley izobhekana neDurban FC koweNedbank Cup kusasa ngoLwesithathu ngo-15h00 eGeorge Campbell. Omunye umdlalo ozophindwa kusasa ngowoMvoti FC neLadysmith United ongaphelanga.

Uzoqala ngo-15h00 eKing Edwards Stadium, eGreytown.