I-ARROWS ETHUBENI LOMKLOMELO WE-PSL
ILAMONTVILLE Golden Arrows isethubeni lokuhlabana ngomklomelo wokuqala wesizini okhishwa yiPremier Soccer League (PSL) ekilabhini eqeda imidlalo eyisi-8 yokuqala ye-Absa Premiership inamaphuzu amaningi kunamanye.
Le kilabhu kaMato Madlala, kayikehlulwa selokhu kuqale isizini okwenza iqhwakele ngamaphuzu ali-12 emidlalweni eyisi-6. Imiswe kabi yiBaroka FC nayo engakehlulwa kule sizini okuyenza ihlale endaweni yesibili ngamaphuzu nemidlalo efanayo.
Kubukeka kuwumdlalo wala makilabhu ozocacisa inkunzi yeQ1 ohambisana nesigaxa sika-R1,5 million njengoba ezobhekana ngomhla zili-18 kuMfumfu (October) ePeter Mokaba Stadium, eLimpopo.
Ngaphambi komdlalo neBaroka, i-Arrows izobhekana neChippa United ngoMgqibelo ngo-15h00 ePrincess Magogo Stadium, KwaMashu. Nakuba la makilabhu kuyiwona womabili angakehlulwa, kodwa neMamelodi Sundowns isenalo ithuba njengoba isalele emuva ngemidlalo yize seyike yaguqa kule sizini ishaywa yiPolokwane City ngo-2-1 kowokuvula isizini.
Ukwenza kahle kwe-Arrows kwenza izikhulu zayo zicace ngombala ezindaweni ezahlukene njengoba izihlathi zishesha ukuvakashela izindlebe wena owabona intombi esanda kuqoma esasanganiswa yisoka.
Uma i-Arrows ingagcina ngokuwuthola lo mklomelo, ingaba yikilabhu yokuqala yaKwaZulu-Natal ukuhlabana ngawo njengoba imvamisa ehlale evika izembe.
Nokho enze kahle ngesizini edlule njengoba eqede ekwi-top 8. Ngesizini edlule isifundazwe besimelwe yiArrows neMaritzburg United. Kule sizini la makilabhu ajoyinwe ngamaZulu FC.