Usabambe igqubu umlolongi weDowns
Lzinqumo zonondweba zimenzele phansi
UBAMBE igqubu uPitso “Jingles” Mosimane ongumqeqeshi weMamelodi Sundowns ehluleke yancama ukuvikela isicoco sayo seCaf Champions League ikhishwa yiWydad Casablanca yaseMorocco sekukhahlelwa amaphenathi.
La makilabhu abambane ngo-1-1 uma sekuhlanganiswa amagoli emilenze emibili njengoba iDowns inqobe ngo-1-0 kuleli yahlulwa ngomphumela ofanayo ngoMgqibelo ebusuku ekuhambeni. Idliwe ngo-3-2 wamaphenathi okwenze iCasablanca yadlulela kuma- semifinal.
UMosimane ukhale ngonondweba obephethe umdlalo womlenze wokuqala obungeSonto eledlule kuleli. Uthi yikulo mdlalo lapho bethenwe khona amandla bevinjwa ngunondweba ukushaya amagoli amathathu.
Ngesikhathi evusa leli gqubu uMosimane, izintatheli zaseMorocco zizwakale zimhleka, zithi lezi zinqumo akhala ngazo zazingaphikisi amabhola ayengene enethini. Bezithi ukujajwa kukaPercy Tau ukuthi ubesendaweni engafanele kakusho ukuthi wayezowahlohla lawo magoli.
UMosimane uphendule wathi: “Kodwa-ke kakumele avinjelwe kungafanele ithuba lokuhlohla amagoli. Lawo mathuba ayengenza umphumela ushintshe kulokhu oyikhona njengamanje. Ngisakhala kakhulu ngawo. Nokho ngiyayibongela iCasablanca.”
Lo mqeqeshi uthi bangene kulo mdlalo bengenalo ngisho oluncane uvalo lokuhlulwa njengoba bengene enkundleni behlasela. Uthi iCasablanca isebenzise isicathulo kulo mdlalo idlalisa kabi abadlali bakhe.
“Kuyinto embi ukuthi izingqwele ziphume ngalolu hlobo. Nokho umphumela ngiyawemukela. Ibhola linjalo,” kusho uJingles ezakhe esezizophinda zibuyele kulo mqhudelwano nangesizini ezayo njengoba zisonge edlule zilele endaweni yesibili emuva kokuba iBidvest Wits ihlwithe indebe ye-Absa Premiership.
Ngokuphuma kulesi sigaba iSundowns kulindeleke ukuba ithole imali ebalelwa ku-R4 million.