ICHIEFS IZOBAMBISANA NEMEYA YETHEKU
IKAIZER Chiefs izobambisana neZandile Gumede Foundation ukuqhuba uhlelo lokutholela izingane zamantombazane imisubelo ngaphambi komdlalo omqoka weAbsa Premiership ezowugijima neBaroka FC ngoMgqibelo ngo18h00 eMoses Mabhida Stadium, eThekwini.
IziMpofana zizohambela eMega City ngoLwesihlanu esitolo sale kilabhu. Izotheleka nengxenye ethile yabadlali njengoba ihlale yenza nxa inemidlalo eThekwini. Lapha kuzokuba nabalingisi boZalo oludlala phakathi nezinsuku kwiSABC1 nabaculi okubalwa kubona uBabes Wodumo noThinah Zungu noMondli Mzizi ongusomahlaya.
UGumede oyiMeya yeTheku, usungule inhlangano yokusiza abahlwempu okuyiyona eqhuba lo mkhankaso waseMlazi.
UJabulani Mbanjani osophikweni lwezokukhangisa kwiChiefs, uthi nangakusasa ngoMgqibelo emini iChiefs izobuyela eMega City.
Uthi amathikithi okubuka lo mdlalo aseyatholakala ema- computicket ngo-R60 awabadala bese kuthi awezingane ezineminyaka engaphansi kweli-12 ubudala abize u-R10.
“Kasifuni ukuzela imizuzu engama-90 kuphela eThekwini. Sifuna ukuba yingxenye yezinhlelo zokusiza imiphakathi okuyiyona eyeseka ikilabhu. Sijabula kakhulu ngokubambisana nenhlangano yeMeya yeTheku. Baningi abantu besifazane abeseka iChiefs, ngakho-ke kumqoka ukuthi sibasize nxa bengakwazi ukuthola izidi- ngo,” kusho uMbanjani.
Nokho-ke uMbanjani akaqinisekisanga ukuthi bazofika nabaphi abadlali eMlazi njengoba bebekade bebhekene neLamontville Golden Arrows ngoMgqibelo ebusuku eFNB Stadium, eGoli. Lo mdlalo uphelele kungu-0-0.
Ngeledlule iChiefs ibigasele KwaZulu-Natal njengoba ibizobhekana neMaritzburg United emdlalweni wePremiership ewunqobe ngo-2-0 wamagoli kaGustavo Paez.