UFISA UKUBUYELA KWIBAFANA OYIBHOLA LE-DOWNS
KUYAMHLUKUMEZA emoyeni uBongi Ntuli ukungacaciselwa ukuthi yini ashoda ngayo ukuthola isikimu kwiMamelodi Sundowns emphilisa ngokumshova lapho ithanda khona.
Lo mdlali uphila ngokubolekiswa kwiDowns njengoba iphinde yamhambisa kwiPlatinum Stars. Uke wabolekiswa nakumaZulu FC phambilini.
UNtuli utshele ILANGA ukuthi kuyamkhathaza ukungatshelwa ngesizathu esenza angalinikwa ithuba kwiSundowns asayina kuyona esuka kwiLamontville Golden Arrows kumasizini amathathu adlule.
Uthi ngabe kungcono ukuba abaqeqeshi beDowns bayamazisa ukuthi yikuphi lapho engenzi kahle khona ukuzama ukunyusa amasokisi khona. Nokho uthi okumqoka kuyena njengamanje wukushayela iPlatinum amagoli okuwumsebenzi alethelwe wona kule kilabhu elolongwa nguRoger De Sa.
“Ngithandazela ukuba nesizini enhle. Ngifisa ukuba le sizini iphele sengishaye amagoli angaphezulu kwali-10. Inhloso yami enkulu wukubuyela kwiBafana Bafana kule sizini,” kusho uNtuli.
Uqhube ngokuthi inkontileka yakhe neDowns iphela ngowezi-2019 okuyikhona okwenza afise ukuba nesizini egcwele ayidlala kwezikaPitso “Jingles” Mosimane ongumqeqeshi.
“Yiqiniso ukuthi kangikwazanga ukukhuluma noMosimane ngaphambi kokubolekiswa ukuze ngilungise amaphutha enginawo ensimini. Nokho sengimane ngazinika isibopho sokuthi okwangaphandle kwenkundla ngikubeke kubantu abaziyo,” kusho lo mdlali odabuka kwaXimba ngaseMgungu-ndlovu.
Mayelana nemibiko yokuthi iPlatinum iyadayiswa, uNtuli uthe bakho- lwa wukuthi uma kwenzeka ngeke kuziphazamise izinkontileka abanazo nale kilabhu.
Uthi okubalulekile kuyena wukusiza uDe Sa ukuthola imiphumela egculisayo kule kilabhu ebambe ibhuleki kwi- log ye-Absa Premiership.