Makuqiniswe imithetho emidlalweni yebhola
IZINTO ezenzeka kunobhutshuzwayo zenza sibone ukuthi sekuyisikhathi sezinguquko kulo mdlalo othandwa umhlaba wonke.
Okwenzeke emdlalweni we-Absa Premiership obuphakathi kwamaZulu FC neBidvest Wits ngoLwesithathu olwedlule, kuyasehlisa isithunzi salo mdlalo futhi kushayelela isipikili ekutheni iningi labadlali bakanobhutshuzwayo kalikwazi ukuziphatha. Into eyenziwe ngumgadli weWits odabuka eMalawi, uGabadinho Mhango, ephimisela ngamathe injini yoSuthu uMichael Morton, ikhombise ukwedelela okuyisimanga.
Lesi senzo simnenge kabi uMorton ogcine edudula uMhango ngengalo - lokho kwenze wathola ikhadi elibomvu. UMhango akaqali ukuthinteka esigamekweni esingenakho ukuziphatha okwamukelekile enkundleni. Kuyona le sizini uSiyabonga Dube weLamontville Golden Arrows, unikwe ikhadi elibomvu emdlaweni weMTN 8 ngenyanga edlule ngenxa yokungqubuza yena uMhango ngekhanda. Kubukeke sengathi kukhona into ayishilo uMhango kuDube emuva kokudlalisana kabi kwabo. Kuyacaca ukuthi lo mdlali waseMalawi onekhono elihle, ukukhonzile ukusebenzisa amaqhinga angcolile ukuchukuluza izitha.
Akwenze kuMorton kubi kakhulu. Ziyadingeka impela izinguquko kunobhusthuzwayo, ukube indaba kanompempe kamabonakude isiyamukeleke ngokuphelele, ngabe unondweba ubonile ukuthi uMorton uchukuluziwe nguMhango - yize singamvuni naye ngokuhlasela lo mdlali. Ukuba kwamukeleke ngokuphelele kunobhutshuzwayo ukuba kubhekwe kumabonakude konke okwenzekile ngaphambi kokuba kuthathwe isinqumo, noMhango ubezothola ikhadi elibomvu. Siyazi futhi siyakuqonda ukuthi izinguquko kazimnandi kubona bonke abantu, kodwa uma ngabe ikhona indlela engcono yokuthatha izinqumo ezisekelwe ngobufakazi, mayisetshenziswe ukuze kube nobulungiswa.
Kwenziwa yini khona ukuthi abadlali bakanobhutshuzwayo baziphathise okwemidlwembe ngisho enkundleni kodwa kube yinto engavamile kweminye imidlalo njengasembhoxweni nekhilikithi? Kungenzeka ukuthi lokho kudalwa wukungaqini ngqi kwemithetho kunobhutshuzwayo. Embhoxweni kakujwayelekile ukuba ubone abadlali begolozela unompempe kodwa kunobhusthuzwayo baze bamkhombe ngeminwe, bamubambe ngamawashingi. Siyazi ukuthi kukhona abakhala ngokuthi ukuba nonompempe kamabonakude kuzobambezela umdlalo, esizibuza khona-ke wukuthi njengoba kuke kulimale umdlali kuhlalwe imizuzu engaphezulu kwemithathu kumiwe, umdlalo kawuphazamiseki yini.
Sibona nje abantu abanqaba ekanompempe kamabonakude bezama ukuvikela ukukhohlakala kwabo. Nabo onompempe ngeke sabanqumela kakhulu ogodweni ngezinqumo abazithathayo kwazise phela iminyakazo enkundleni iyashesha. Kuba ngabantu abasuke bebukela komabonakude abakwazi ukubona iphutha kwazise khona lilokhu liphindaphindwa. Izigameko ezifuze lesi sikaMhango, kumele zenze izikhulu zikanobhutshuzwayo zicabange kaningana. Le nto ingaze idale ukuthi kube namaganyana anobuhlanga noma ubuzwe kwazise iNingizimu Afrika Ifana nomhlanga omile emanzini uma kukhulunywa ngeyobuhlanga.
Abantu bakuleli bayashesha ukubona isizathu sobuhlanga kunoma yini esuke yenzekile, ngakho-ke kumele sisheshe sizigweme lezo zinkinga ngokushaya imithetho enika isifundo kubantu abasuke benze okuphambene nomthetho. Uma nje uMorton ubengasuka abase umlilo athi le nto eyenziwe nguMhango, uyenze kuyena ngenxa yebala lakhe, bekuzoba njani njengoba eNingizimu Afrika sikuthanda kangaka ukusheshe sibone ukuthi izinto zenziwa ngezinye izizwe kithina ngoba nakhu singabebala elithile? bekuzofanele uMhango ajeziswe kanzima ngalesi senzo sakhe ngoba seneka nayo nje i-Absa Premiership njengenhlangano engenamthetho futhi efana nobhova ongenamazinyo.
Ake abadlali bakanobhutshuzwayo bayoncela kwabeminye imidlalo ukuthi benza kanjani ukuze bakwazi ukuziphatha enkundleni nangaphandle. Abadlali bakanobhutshuzwayo kabakwazi ngisho ukuhlonipha abalandeli, okuyibona abantu abafana nabaqashi babo ngoba ngaphandle kwabo, bangabukwa yizihlalo. Sinxusa iPSL neSouth African Football Association (Safa) ukuba baqinise amabhawoti - yize sazi ukuthi imithetho kanobhutshuzwayo ngeyeFifa.