KUKHONYE ABOKUFIKA KWI-TOWNSHIP TO TOWNSHIP
USANELISIWE Mbanjwa noSphamandla Nyembe baphakamise ifulegi laseNingizimu Afrika bengena nabokuqala abathathu kwiTownship to Township Marathon izolo ngeSonto eqale ePrincess Magogo Stadium, KwaMashu, yasongwa eKing Zwelithini Stadium, eMlazi.
Lo mjaho ubugubha unyaka wesi-8 wasungulwa kanti izingqwele zawo kube nguPhakoene Rakoto waseLesotho osubathela iPhantane noLoveness Madziva waseZimbabwe weNedbank. Izindawo zesibili zithathwe ngokwahlukana ngu-Isaac Mpofu waseZimbabwe noJennifer Koech waseKenya kwathi uSanelisiwe noNyembe bathatha izindawo zesithathu ngokwahlukana kobulili.
Okuphawulekile kulo mjaho wukuthi uSanelisiwe wePhantane ubesubatha i-marathon yakhe yokuqala. Ushaqise abaningi eshiya abasubathi asebemnkantshubomvu bakuleli. Phakathi kwabo bekukhona uFikile Mbuthuma onegolide kwiComrades Marathon ogcine engene endaweni yesine ngesikhathi esingu-1:12. USanelisiwe utshele leli phephandaba ukuthi simumangazile isikhathi asenzile.
“Lo mjaho unzima ngendlela eyisimanga. Ulukhuni emakhilomitheni okuqala noma usuya ngasemaphethelweni unzima kwazise unemiqansa ekhamanayo. Ngokwami kasikho isikhathi ebengizimisele ngokusenza, bengifuna ukuqeda nje kuphela. Ukungena nabokuqala abathathu kube yibhonasi. Ngiqale ezinyangeni ezine ukuzilungiselela i-marathon,” kusho uSanelisiwe.
Umqeqeshi wakhe futhi ongumphathi wePhantane, uMduduzi Khumalo, uthi kuningi akulindele kulo msubathi. Uthi ukuba umzila ubungenayo imiqansa ubezokwenza isikhathi esingaphansi kwamahora amathathu. Uthi okumsize kakhulu wukuthi uziqeqesha nabafana kwazise bayagqoza abasubathi besifazane kuleli ikakhulukazi esifundazweni.
UNyembe utshele abezindaba ukuthi lo mjaho uzomsiza kakhulu ukuba akwazi ukuvikela isicoco sakhe seWoodlands Marathon asinqobe ngoNhlolanja (February) phesheya kwezilwandle.
UNyembe uthi ubezimisele ukuyogijima iColombia Marathon kule nyanga kodwa ngeke esakwazi ngenxa yezingqinamba ezithile. Uthi usezogxila kakhulu emabangeni amafushane ukuze akwazi ukuba nesivinini seWoodlands ngonyaka ozayo.
ULoveness umangaze abasubathi abaningi kwazise ngeledlule udle ubhedu kwiMossel Bay 21km. ULoveness uthi uphoqelekile ukuba agijime amabanga amade kwazise amafushane kwawanayo imali.
Uthi umjaho awubheke kakhulu yiHarry Gwala Marathon ezokuba ngonyaka ozayo okuthiwa nayo isizokhipha imiklomelo yezimoto kwizingqwele.
Isiyonke imiphumela yalo mjaho ihambe kanje, kwabesilisa: 1. Phakoane Rakoto (Phantane) 2:25:27, 2.Isaac Mpofu (Maxed Elite) 2:25:46, 3.Sphamandla Nyembe (Ethekwini) 2:25:54, 4.Pule Maeko (Rockies) 2:26:18, 5.Gilbert Matandiro (IND) 2:26:49, 6.Vumani Mlaba (Ethekwini) 2:27:09, 7.Anele Dlamini (Phantane) 2:29:23,
8.Thulani Thokozani Duma (Nedbank) 2:29:29, 9.Tsepang Mokhethi (Phantane) 2:30:20, 10. Bernard Dandadzi (Maxed Elite) 2:30:55.
Kwabesifazane: 1.Loveness Madziva (Nedbank) 2:52:06, 2. Jennifer Koech (Nedbank) 3:06:31, 3.Sanelisiwe Mbanjwa (Phantane) 3:08:21.
Kwi-21km, kwabesilisa: 1.Sipho Mbanjwa 1:07:33, 2.Nkosikhona Mhlakwana 1:07:52, 3.Siphesihle Masondo 1:10:06, 4.Sphesihle Cebekhulu 1:12:55, 5.Mncedisi Mkhize 1:12:55, 6.Siyabonga Mabena 1:14:00, 7.Derick Gumede 1:14:57, 8.Msizi Gumede 1:17:00, 9.Phumelele Baqwa 1:17:48, 10. Siphesihle Langa 1:18:01.
Kwabesifazane: 1.Jenet Mbhele 1:20:39, 2.Janie Grundling 1:22:18, 3.Slindile Chili 1:24:29, 4.Mwabisa Mjoli 1:25:35.