Udephunwe yizinja zomqashi washona
Umqashi ubuze ukuthi umufi akanazifo ezizothelela izinja
ZIYAQAQAMBA izinhliziyo zomndeni wowesilisa waseBahhedle, eGingindlovu, ogwini olusenyakatho yeKwaZulu-Natal, olunywe yizinja zomqashi wakhe washona, maqede wabuzwa ukuthi ubengenaso yini isifo esithelelanayo - ukuze zizohlolwa ukuthi kazithelelekanga yini.
Kuthiwa ngumqashi kaMnu Khulekani Mthembu (33), obuze lokhu emndenini wakwaMthembu. Lo mndeni uthi ufuna amaphoyisa aphenyisise ngoba kaweneme neze ngencazelo oyitholayo ngokushona kukaMnu Mthembu, edephunwa yizinja esemsebenzini.
Kubikwa ukuthi zimdephune umzimba wonke waphuthunyiswa esibhedlela, okuyilapho eshonele khona. UNkz Greta Mthembu, ongudadewabo kamufi, uthi namanje basenemibuzo ngokushona komfowabo ngale ndlela. Uthi ubeseneminyaka esebenza kule ndawo eseMhlali, enyakatho yeTheku kanti nezinja ezimlumile besezimjwayele ngoba ubegada zona, eziphakela.
“Ngelanga lesigameko sitshelwe ukuthi ubeyozikhulula njengoba ubejwayele ukwenza uma sekuntambama, zabe seziyamluma. Kuyasidida lokho ngoba umfowethu ubenesikhathi lezi zinja esebenza ngazo. Okwenza sidideke kakhulu, kumakhalekhukhwini wakhe sithole umqhafazo awuthunyelelwe ngumqashi ngaphambi kokuba ahlaselwe yizinja.
Kulo mqhafazo, bekukhona amagama alumelayo angehlanga neze kahle kithina. Konke lokhu kusishiye nemibuzo esethemba ukuthi amaphoyisa azosiza siphenduleke kuyona," kusho uNkz Mthembu. Uthi ngesikhathi beya lapho bekusebenza khona umfowabo, umqashi akakhombisanga ukuzwelana nabo njengoba ebatshele ukuthi umufi bezingeke zimsukele izinja. Lokhu uthi bakuthatha njengokuchwensa.
“Emuva komngcwabo usinikeze u-R5 000 njengesinxephezelo kodwa siyafisa amaphoyisa enze umsebenzi wawo, aluphenyisise lolu daba ngoba siyasola kukhona okushaya amanzi,” kusho yena.
uLindsey Concer wakwaSociety for the Prevention of Cruelty to Animals (SPCA), uthe kuncika ekubeni inja iqeqeshwe kanjani nanokuthi umuntu uyiphethe kanjani - ize yenze into efuze le eyenziwe ngezomqashi kaMnu Mthembu.
Okhulumela amaphoyisa KwaZuluNatal, uCapt Nqobile Gwala, uthe amaphoyisa aphenya ngokufa komuntu emuva kokuba owesilisa oneminyaka engama-33 elunywe yizinja washona. Uthe uma umndeni kamufi unezikhalo noma unobunye ubufakazi obungalekelela amaphoyisa, kumele uxhumane nomphenyi wecala ukuze ezokubheka lokho.