Ukhonjwa eGoli "ontshontshe" ingane
Uthumele umqhafazo exolisa ngokuthatha ingane
USEKHONJWA eGoli owesifazane osolwa ngokuntshontsha indodana kakanina eMurchison, ePort Shepstone, ogwini oluseningizimu yeKwazulu-Natal, osekuyophela isonto lesibili enyamalele nayo.
UMnu Charles Nkonyeni, onguyise kaChristopher Khutyiswayo (onezinyanga eziyi 9), utshele ILANGA ukuthi kumanje wehla uyenyuka namaphoyisa emigwaqweni yaseGoli uthungatha indodana yakhe okuthiwa yebiwe nguNkz Nqobile Ndovela (19) waseGamalakhe, ePort Shepstone, ozalwa ngudadewabo kanina (kaMnu Nkonyeni).
ILANGA libike kabanzi ngalolu daba ngeledlule lapho kuvele ukuthi uNkz Ndovela ufike ngoLwesihlanu olwedlule evakashile kubo kaMnu Nkonyeni sekunesikhathi eside egcinile ukubavakashela. Kuthiwa ngosuku afike ngalo, ucele ukulala nengane kodwa abazali bayo bamnqabela ngoba bebona ukuthi isencane kakhulu ukuthi ingalala ngaphandle kukanina.
Bamduduze ngokuthi ingane izosala naye ngakusasa uma sebeye emsebenzini. Kuthiwa unina kaChristopher umshiye koyisekazi (odadewabo bakayise wengane), okuyibona abajwayele ukuyigada uma yena esemsebenzini. Kubikwa ukuthi ngesikhathi eyishiya ingane noNkz Ndovela ubekhona.
Kuthiwa sebehambile abazali bengane, uNkz Ndovela uphume ekhaya engumuntu ophuthuma eSayidi ehamba nengane watshela oyisezala bayo ukuthi kunomuntu amphuthumisela isikhwama sakhe edolobheni, uzosheshe abuye. Bathi ngesikhathi ehamba ubadonse ngendlebe ukuthi bangabatsheli abazali bengane ukuthi ubehambe nayo.
Kusolwa ukuthi uNkz Ndovela uthathe le ngane ngenhloso yokuyihambisa esokeni lakhe, okukholakala ukuthi ubelikhohlisile wathi ukhule- lwe. Kuthiwa ngosuku anyamalale ngalo nengane, uthumele umqhafazo sekuntambama exolisa ngokuthatha ingane. Uthembise abazali bayo ukuthi usendleleni uyiphindisela kubo.
Kuthiwa bagcine lapho ukumthola ocingweni lwakhe, luvaliwe akatholakali. Kuthiwa ngesikhathi efona ucingo lwakhe beludonsa eMgungundlovu.
“Ngibuhlungu ngento eyenziwe ngumzala wami ukuthi usengaze angizwise ubuhlungu obungaka, athathe indodana yami engayicelile. Okungiphatha kabi kakhulu, unina (kaNkz Ndovela) uzithele ngabandayo, akakaze azihluphe nakanye ngokubuza ukuthi ingane isitholakele yini nokuthi abambisane nathi sibheke indodakazi yakhe.
“Uzihlalele emzini wakhe, namaphoyisa uma efuna ulwazi ngendodakazi yakhe uwatshela ukuthi akanalwazi,” kusho uMnu Nkonyeni ebalisa. Uveze ukuthi uNkz Ndovela uyingane ehamba ihlala njengoba kuke kuphele isikhathi eside engaziwa kubo.
“Ngicela abambonayo lapho ekhona baxhumane namaphoyisa aseduze ukuze kuhlengeke indodana yami. Okungikhathaza kakhulu, akazange akuthathe ngisho ukudla kwayo ngesikhathi eyintshontsha, kangazi nokuthi ilala idleni lapho ikhona,” kusho yena. Okhulumela amaphoyisa KwaZulu-Natal, uCapt Nqobile Gwala, uthi amaphoyisa asathungatha umkhondo kaNkz Ndovela.
Uthi amaphoyisa aphansi phezulu nophenyo.
UCHRISTOPHER Khutyiswayo