UMPHAKATHI UBHIKISHELE UMGUNYATHI NGESIKHUNGO
UVUKE umbhejazane ngoLwesibili umphakathi waseJozini, enyakatho-mpumalanga yeKwaZulu-Natal, wavala isikhungo sokuqeqeshela amakhono ngenxa yombango wokuhlungwa kwentsha okumele ifunde kusona.
I-MTL Trading Skills and Development, inamasonto amabili ivulwe ngokusemthethweni kanti ukwakhiwa kwayo kususe omkhulu umsindo emphakathini njengoba kubikwa ukuthi kunamakhansela ashushumbise intsha ebingekho ohlelweni ngesikhathi kuhlungwa, yabonakala isifunda.
Kuvela ukuthi kuthathwe izinombolo zomazisi zashushumbiswa ngabathile kuMasipala wesiFunda uMkhanyakude, zafakwa ngopotsho. Umthombo weLANGA uthi ngesikhathi kwethulwa lolu hlelo - lokuqokwa kwentsha ezofunda - bekucelwe amakhansela ukuba ahlunge abazoqeqeshwa iminyaka emithathu, baholelwe u-R2 500 ngenyanga njengoba isikhungo sizobe sigxile emsebenzini wezandla - okubalwa ukuxhunywa kwamapayipi, wukubaza, nokwakha izindlu.
Uthi okuthuse kakhulu wukuthi kubonakale nabantu okungebona abendawo, abebengekho ohlwini sebefunda. “Umphakathi udinwe wukuthi ngesikhathi kukhethwa abafundi, belumenyezeliwe uhlu kwezwa bonke abantu kodwa uma sekufundwa kwavumbuka nabantu abebengamenyezwanga.
"Kugcine sekutholakala ukuthi kunosopolitiki abasebenzise amandla abo bafaka abangani babo ngokuxhumanana nomasipala ngoba yiwona obhekelele lesi sikhungo,” kusho umthombo.
Ikhansela lakuWadi 8, uMnu Lotus Mavundla, esisendaweni yalo lesi sikhungo, lithi ewadini yalo konke bakuhambise ngendlela.
UMnu Mavundla utshele ILANGA ukuthi yena ubethole umyalelo wokuthi ewadini yakhe kumele athole abafundi abali-15.
Ubize umhlangano ovulelekile kwakhethwa futhi kwaneliseka bonke abantu.
Okhulumela uMasipala waseMkhanyakude, uMnu Mduduzi Dlamini, uthi kakusilona iqiniso ukuthi kunabantu abebengekho ohlwini lwamawadi.
“Umphakathi udidwe wukubona sekufunda abantwana abavela eMtubatuba, KwaMhlabuyalingana naKwaHlabisa, mhlawumbe ubuzitshela ukuthi lolu hlelo luzobhekelela abaseJozini kuphela kanti phela ngoloMkhanyakude wonke. Yingakho-ke sekunokukhuluma okuthi kubonakale abantu abangaziwa ohlwini,” kusho uMnu Dlamini.
Uthi lesi sikhungo bebesicele kuhulumeni bathola noxhaso lwemali ngenxa yokuthi intsha yaseMkhanyakude iyashoda kwezamakhono.
mthobisis@ilanganews. co.za