AKAYI NDAWO USBU KWISIBAYA
AMAPHAPHU phansi kubalandeli bomlingisi uSdumo Mtshali olingisa uSbusiso Ndlovu kwiSibaya abese bezitshela ukuthi useyaphuma njengoba kuphele usuku lwangoLwesihlanu olwedlule eshayiswe yimoto.
Lokhu kwenzeke ngaphambi kokuba uSbu athole izindaba zokukhulelwa kukaThandeka (Nomzamo Mbatha). Isiqephu sangoLwesihlanu emdlalweni iSibaya esikhonjiswa kuMzansi Magic (161), sishiye abantu bezibuza ukuthi ngabe kuzokwenzekani njengoba sekuke kwenzeka uSbu noThandeka banyamalala phambilini kulo mdlalo ukuyofuna amadlelo aluhlaza.
Abantu bese benyuse amaphaphu beshwabula becabanga ukuthi lokhu sekusho ukushiya phansi kukaSbu olingisa kulo mdlalo, kodwa umthombo othembekile ongaphakathi ukuqinisekisile ukuthi lutho abantu mabehlise amaphaphu ngoba uSbu akayi ndawo.
Lo mthombo uphinde wakuqinisekisa ukuthi okwenzeke kulesi siqephu bekuyindlela yokukhuphula umdlandla kubabukeli njengoba kubonakala sengathi abantu sebehlelwe ngumdlandla wokubuka iSibaya selokhu kuphele izinto ezihlaba umxhwele kulo mdlalo futhi ingasekho into eyenza bahlale kuwona.
Kuzokhumbuleka ukuthi lo mdlalo usunokuncintisana no- mdlalo okhonjiswa kuSABC 1 Uzalo nawo oshisa izikhotha kulezi nsuku. Lo mthombo uphinde washo ukuthi abaqophi balo mdlalo bazamile ukugcina ababukeli njengoba kuke kwanda izinsolo zokuthi uSihle (Zinhle Mabena) uzoba ngumkhovu kaSunday kodwa lokhu kubonakale kungatheli zithelo.
Lokhu kuholele ekutheni kuzanywe elinye icebo lokuheha ababukeli, njengoba kufike ekutheni uSbu ashayiswe yimoto. Lo mthombo uphinde wapotshoza ukuthi lukhulu luyeza ngalo mdlalo nezigigaba ezizokwenzeka kuwona njengoba abaqophi bezama ngawo wonke amandla okunqoba abalandeli abasha baphinde bagcine laba abakhona.
Imizamo yokuthola u-Emmah Ngomane okhulumela iBomb Production, okuyinkampani eqopha iSibaya, ayizange iphumelele, ucingo lwasehhovisi lakhe belukhala luze luzithulise. Simthumelele imibuzo nge- email kodwa kuze kwashaya isikhathi sokushicilela engakaphenduli.