Bafana nekati elibekelwe ubisi nenyama
EZOKUGIJIMA: Mihle imiklomelo kuLundi 10km nakwiFNB 10km
BAFANA nekati elibekelwe ubisi nenyama abasubathi bebanga lika-10km njengoba behlelelwe iziteki ezimbili eziconsisa amathe kule mpelasonto KwaZulu-Natal.
Isiteki sokuqala sizobangwa emjahweni uLundi Municipality 10km Challenge ohambisana ne5km ozokuba ngoMgqibelo kusuka ngo-6 ekuseni oLundi Regional Stadium, oNdini. Ngakusasa ngeSonto kuzogaduliswana kwiFNB Durban 10km CitySurfRun, eThekwini.
I-FNB 10km izoqala ngo-08h00 emgwaqweni uMasabalala Yengwa ngaphambi kwaseMoses Mabhida Stadium bese isongwa eBeachfront, phambi kwaseMoses Mabhida.
Yomibili le mijaho ibeke iziteki ezinhle kubasubathi abazokudla ubhedu njengoba kwiFNB Durban 10km ozonqoba ezogoduka no-R25 000, isibili uR13 000, isithathu uR10 000, isine uR8 000, isihlanu uR7 000, isithupha uR6 000, isi-7 uR5 000, isi-8 uR4 000, isi-9 uR3 000, bese ishumi kuba nguR2 000.
Ozoshaya intambo oNdini uzothola u-R10 000 kubona bobubili ubulili, kuthi isibili kube ngu-R5 000 bese isithathu sigoduke no-R3 000 kulo mjaho okukhokhwa u-R50 nje kuphela ukubhalisa.
Nakwi-5km oNdini kubekwe imali enhle njengoba abazonqoba bezothola ama-voucher kaR3 000, isibili kube ngawenani likaR2 000 bese isithathu kuba ngawelika-R1 000.
Nasebekhulile babhekelelwe njengoba ozoshaya kuqala intambo kwabaneminyaka ephakathi kwengama-35 nengama-39 ezothola uR3000, kuthi ophakathi kwengama-40 nengama-49 azuze uR5000, bese ophakathi kwengama-50 nengama-59 ehlomula uR7 500 kuthi onengaphezulu kwengama-60 aklonyeliswe ngoR10 000.
Ukubhalisela umjaho wasoNdini kuyaqhubeka emahhovisi alo masipala kanti kusasa ngoLwesihlanu amahhovisi azovala ukwamukela imingenelo ngo-20h00, bese kuthi ngoMgqibelo yamukelwe kusuka ngo-3 kuya ku-05h30 ekuseni enkundleni ukuvulela ithuba abaqhamuka ezindaweni eziqhelile.